J. C. A. 47 urteko gizona atxilotu zuen Ertzaintzak pasa den igandean, Bilboko Maximo Agirre kaleko bere arte-martzialen gimnasioan 29 urteko emakume gazte bat koman uzteraino jipoitzen ari zela, Poliziaren arabera. Bertsio berari jarraiki, inguruak miatuta, ertzainek hildako beste emakumeren baten gorpuzkinak topa dituzte lokalean eta erasotzailearen etxean eta gizonak aitortu ei du pasa den astean beste andra bat hil zuela. Bitartean, igandean askatutako emakumea koman jarraitzen du Basurtuko ospitalean. Horren aurrean, ugariak izan dira salaketak eta mobilizaziorako deialdiak. Euskal Herriko Emakumeon Mundu Martxa plataformako kidea den Algortako Bilgune Feministaren ustez gertatutakoa "oso oso larria" da eta horri dela eta eraso mota honi erantzuteko protokoloa abian jartzea erabaki dute, deialdi bikoitza eginez. Gaur, asteartea, arratsaldeko 7:30ean Bilboko Indautxu plazan elkarretaratzea egitera deitu dute. Handik, erasoak izan ziren gimnasiora eramango dute protestaldia. Bihar, asteazkena, beste mobilizazio bat burutuko dute Algortako Telletxe plazan, 19:30ean. Bitartean, prostituzioan aritzen diren emakumeekin jarduten duen Askabide elkarteak jipoitutako emakumea eta oro har kolektibo hori "babes gabe" daudela deitoratu du, eta beste elkarretaratze isila deitu du gaurko, arratsaldeko 6:30ean, Bilbo Zaharreko Fleming Doktorea plazan, Kortes kalearen ondoan. Argazkian, 2012ko azken elkarretaratzea azaroaren 29an izan zen, Tere Egurrola Asparrenako emakumearen ustezko erailketa salatzeko.
Bilkoko erasoen aurretik, aurten hiru aldiz salatu dituzte eskualdean emakumeen erailketa sexistak. Lehena otsailaren 2an izan zen, Antsoainen urtarrilaren 31n labankadaz eraildako 43 urteko M.M.O.-ren heriotza salatzeko ekimena. Kasu hartan, bertsio ofizialak baztertu egin zuen bortxakeria matxistaren hipotesia. Bestalde, maiatzaren 13an salatu zuten Algortan oraindik argitzeke dagoen Gasteizko auzia. Aurretik, maiatzaren 9an, Maria Angeles M. eta Agustin G. senar-emazteen gorpuak aurkitu zituzten Gasteizko Lakua auzoko etxebizitza batean. Zenbait egun zeramatzaten hilda eta Segurtasun Sailak ezin izan zuen baieztatu genero indarkeria kasua izan ote zen edo bikoteak beren buruaz beste egin zuen. Andrak 53 urte zituen eta gizonak 61. Azken protestak maiatzaren 24an eta 27an jazo ziren Larrabasterran, Algortan eta Leioan, Amagoia Elezkano 26 urteko emakume gaztea Laudion labankadez erail zutela salatzeko.
Indarkeria sexistaren kontrako protokoloa
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun