Nazio Batuen Erakundearen (NBE) Giza Eskubideen Kontseiluak Anjel Figueroaren heriotza aztertu zuen pasa den ostiralean. Algortako Herrirak zabaldu duenez, Europa Hirugarren Mundua Zentruak (CETIM) ahozko deklarazioa egin zuen egun horretan Giza Eskubideen Kontseiluko 23. saioan, Nazio Batuek Ginebran duten egoitzan. Deklarazioan, nazioarteko erakunde horren aurrean aholku-emaile estatusa duen eta Ginebran egoitza duen CETIMek gaixotasun larria duten presoen inguruko kezka adierazi zuen. Bereziki, martxoan hildako bi preso politikoen inguruan egin zuen salaketa, Anjel Figueroa Fernandez algortarra eta Xabier Lopez Peña galdakoztarra. Horrezkero, gaixo dauden presoak askatu ditzaten espainiar eta frantses gobernuei exijitzeko eskatu egin zuen CETIMek. Izan ere, "gaixotasun larriak pairatzen dituzten preso politikoei askatasuna ukatzea, giza duintasunaren aurka joateaz gain, beraien osasunerako eskubidea urratzen du", erakunde horren ustez. Argazkian, Anjel Figueroaren aldeko protesta bat artxiboko irudian / cc-public domain Etengabe.
Modu berean, presoen aurkako salbuespenezko neurriekin bukatzeko eskatu zuten, dispertsio politika bereziki aipatuz, berau "justifikazio gabeko politika krudel honek familiak amaigabeko bidaiak egitera behartzen dituelako bere senideak ikusi ahal izateko". Modu berean, CETIMek Giza Eskubideen Kontseiluari eskatu zion "bi estatu hauetan mekanismo egokiak martxan jartzeko, euskal preso politikoek pairatzen dituzten eskubideen urraketak aztertzeko". Martxoko Giza Eskubideen Kontseiluko saioan, euskal preso politikoen kontrako neurriak salatzen zituen idatzizko agiria aurkeztua izan zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun