Nahikari Ayo: "Agur, San Mames"

Ukberri 2013ko ekainaren 12a

[© Nahikari Ayo - Goiena.net] Asteazkenean, Athletic zaleok, San Mames zaharra agurtu genuen. Batzuk, tamalez, etxetik. 89tik bazkidea naiz, baina gero luxu handiagoa da Athleticeko bazkidea izatea, eta are gehiago krisi garaian. Horregatik lagun batek erabiltzen du. Baina agian datorren urtean, berriro hasiko naiz domeka arrastiak San Mames Barrian igarotzen. Kapitainak irten zirenean hunkigarria izan zen. Nik zer esango dizuet, baina Genar Andrinua eta Iribarrekin hunkitu nintzen. Genar, auzokoa da, Erromokoa. Eta txikitatik miretsi izan dudan jokalaria da. Nire lehen urteetan bazkide moduan, bera izan zen Athletic-eko kapitaina. Eta Iribar… Iribar da! Handia, sekulakoa, gertukoa, bakarra! Athletic-eko Txopo! Argazkian, Genar Andrinua itzubaltzetarra pasa den asteazkenean San Mames futbol zelaiaren agurrean / © Athletic.

Eta hemen dakartzuet argazki bat, 23 urte baino ez dituena… Ikastolan futbolean hasi berri eta gainera ikastolako mutil “basati” guztiekin. Denboraldi bukaeran, Iribarrek saria eman zidan, futbolean zebilen neska bakarrenetakoa nintzelako.

Athletic talde bat baino gehiago da. Sentimendu bat. Sufriarazten dizun taldea, poztasunak ematen dizkizuna,… San Mamesen gauza asko ikusi ditut: Ligako partiduak, kopakoak, UEFAkoak , Txanpionsekoak, Milan, Brasil, Selekzioa,… San Mamesek une ahaztezin ugari bizi izan ditugu. Jokalari asko ikusi ditut: Argote, Urtubi, Urrutia, Luke, Larrainzar, Cuco, Rios, Tiko, Lacruz, Etxebe, Larrazábal, Tabuenka, Suances, Huegun, Alkiza… Eta bestela mila!

Eskerrik asko San Mames eta Aupa Athletic!

Nahikari Ayo blogaria eta bertsolaritzako irakasleak pasa den ostiralean Nire Begietatik bere blogean argitaratutako artikulua

Iritzia

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!

Izan zaitez HIRUKAlagun