Itxaso Araque idazlea izango da bihar Algortako Irakurzaleen Txokoan

Itxaso Araque Barriuso 25 urteko idazle donostiarra izango da bihar, osteguna, Uribe Kostako Irakurzaleen Txokoan, Algortan. Egizu! Getxo Euskaldun elkarteak zabaldu duenez, “Damutzen ez direnak” Araqueren lehenengo eleberria izango dute mintzagai ikasturteko azken saioan. Ohi bezala, hitzordua Aldai Patronatuan jarri dute, arratsaldeko 8etan. Itxaso Araque Barriuso 1988an jaio zen Donostian, Gasteizen ikasi zuen Itzulpengintza, eta Ingalaterran jarraitu du lanean eta ikasten, Londresen eta Cambridgen. 2011ko Augustin Zubikarai bekari esker idatzi zuen "Damutzen ez direnak" bere lehenengo eleberria, Elkar argitaletxea dela medio 2012ko abenduaren 20an jendaurrean aurkeztu zuena. LIburuan, hiru pertsonai, Stu, Andreas eta Naroa, hiru istorio eta hiru hiri, Londres, Berlin eta Milan, erabiltzen ditu Araquek 30 urteko belaunaldiaren erradiografia egiteko. “Nik uste belaunaldi horrek ezkutatu nahi izan duela pairatu duen alienazioa, balio batzuekin hazi eta horiek bertan behera utzi behar izatearena”, uste du idazleak. Argazkian, Itxaso Araque / cc-by-sa Uberan.org.