Euskal Herriko beste hainbat herritan bezalaxe, abenduan “Gazta zati bat” dokumentala ikusteko aukera egon zen Sopelan, Meñakoz Kultur Elkarteak antolatutako proiekzioari esker. Ikus-entzunezko lan horrek izan duen oihartzunari esker, Nazioen Mundua ekimenak egin duen lana ezagutzera eman da Euskal Herri osoan, eta ildo horri jarraituz hainbat herritan erabakitzeko eskubidearen aldeko herritarren dinamika sortzeko asmoa dago: “Gure esku dago” dinamika. Sopelan bihar, ostirala, izango da aurkezpena, 19:30ean Kurtzio Kultur Etxean, udal iturriek zabaldu dutenez. Bertan, ‘Gure esku dago’ dinamikaren nondik norakoak azalduko dira. "Zergatik erabakitzeko eskubidea? Eskubide pre-politikoa, demokratikoa eta unibertsala delako eta herri honen sentsibilitate guztien elkargunea sortzen duelako", azaldu dute tokiko arduradunek. "Gure esku dago" dinamikaren helburuak "erabakitzeko eskubidearen beharra, aukera eta zilegitasuna gizarteratzea eta herritarrak aktibatzea" dira. "Guzti hori errespetua eta batuketan oinarrituz eta jarrera positibo batekin, gure printzipioak dibertsitatea eta pluralitatea direlarik. Hiru ideiatan oinarritzen dira: nazio bat gara, erabakitzeko eskubidea dugu eta etorkizuna herritarron esku dago", zehaztu dute Sopelako Udaletik. Argazkian, 2012ko azaroaren 17an 250 auzokide inguru batu zen Sopelako Udaletxeko plazan, Espainiako banderaren "inposizioa" salatzeko asmoz / cc-by Sopelako Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun