Urtarrilean martxan jarri zen Leioa BiziZberritzen proiektua. Egitasmoa azken urteetan Leioan euskalgintzan eta kultur arloan lanean egon diren hainbat lagunen artean zirriborratu zuten eta helburu nagusia, "zentzurik zabalenean, bizirik dagoen Leioan bizi nahi dugunon topaleku euskaldun, anitz eta parekidea eraikitzea" zen. "Hitzak dioen moduan gune fisko batez ari gara, baina baita beste gauza askoren artean, harreman, elkarlan, sinergia, komunitate, ideia eta herri-giroaz ere. Horretarako ahalik eta jende eta eragile gehienekin elkartu, proiektua konpartitu eta bakoitzaren ekarpenak jaso nahi ditugu", azaldu zuten orduan ekimenaren sustatzaileek. Bada, hilabeteetako lanaren ondorioz, egitasmoa aurrera eramateko lokala badaukate. Ongi Etorri herri-topalekua Iturribe kaleko 7. zenbakian kokatuta dago eta horren aurkezpena apirilaren 13an egin zuten. Bada, orain, ekitaldiak antolatzen ere hasi dira. San Juan jaietarako motorrak berotzen hasteko, gaur, ostirala, Ongi Etorri Jaia izango da herri-topalekuan. Horrenbestez, 18:00etatik aurrera taberna zabaldu, Ongi Etorri pintxoa aurkeztu, umeentzat tailerra eta jolasak egin eta giro ezin hobeaz gozatzeko aukera izango dute. Eta 21:00etatik aurrera Triskele folk taldearekin kontzertua egongo da. Argazkian, Korrika 16 euskararen aldeko lasterketaren hasiera ospatzeko, 2009ko martxoaren 27an kantu afaria egin zuen Leioako Berbalamiñe euskara taldeak / © Berbalamiñe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun