Orain hiru urte eta erdi irekitako Plaza Beltza kulturgunea pasa den maiatzaren 31n itxi zuten behin betiko, lagapen hitzarmena ekainaren bukaerarekin amaituko dela. Handik hona, lokalez aldatzeko makina bat lan egin dute Plaza Beltzako kideek, lonja ezberdinak ikusi, behin behineko biltegiak aztertu eta kulturgunean den material guztia sailkatu, paketatu eta garraiatzeko antolatzea, kasu. Atzo gauean proiektuko kideek jakinarazi zutenez, lan horri segida emateko "laguntza eskatzeko" unea heldu da. Horregatik biharko, asteartea, auzolanak antolatu dituzte kulturgunean, goizeko 8etatik aurrera. Egin beharrekoak material guztia Plaza Beltzako lokaletik ateratzea eta Sopelako Udalak eskainitako leku batean uztea izango dira, "hurrengo egoitza ziurra izan arte". Giza laguntzaz gain, "furgonetak, kamioiak, asto-gurdiak edo bestelakoak" ekartzea ere eskatu dute eta baita norberak ezagunen artean auzolan deialdia zabaltzea ere. Argazkian, lokalaren inaugurazioa 2009ko azaroaren 6an.
Plaza Beltza kolektiboa 2006ko udazkenean sortu zen, "kultura plazaratzeko eta ideiak zabaltzeko" asmoz, eta 2006ko abenduaren 23an burutu zuen bere lehenengo ekimena, bigarren eskuko liburu azokatxoa. Hasieratik lokala irekitzea izan zuten jomugatzat eta hasiera batean, helburu horrekin dirua irabazteko liburu azokak eta jaiak izan zituzten hizpide. Lokala hitzartuta, lan luzea izan zuten aretoa egokitzeko, taldea sortu eta hiru urtetara estreinatu zutela. Handik aurrera, makina bat ekitaldi burutu dituzte, hitzaldiak, liburu aurkezpenak, bideo-forumak eta baita kontzertuak ere, dena Sopelari kultur, politika eta jendarte topagune parte-hartzailea emateko zein irakurzaletasuna bultzatzeko asmoz. Urteetan batutako kalitatezko materialari Likiniano eta Gatazka proiektuek utzitako liburu, aldizkari, fanzine eta DVD bildumak batu zitzaizkion ere, liburutegi oso hornitua baina bisita gutxikoa osatuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun