Ospakizunek iaz abiatutako jai-eredua izango dute hizpide: batetik, Jai Batzordeak txalotu nahi du herriko hainbat elkartek, kirol taldek eta koadrilek egindako lana. Bestetik, emakume eta gizon, neska eta mutilen arteko parekidetasuna sustatu dute, jaien alderdi guztietan. Horretaz gain, euskaraz bizi nahi duela aldarrikatu du Jai Batzordeak, "eta jaietan are gehiago!". Azkenik, jai parte-hartzaileak sustatuko dituzte: "sopeloztarrak gara jaien protagonista eta jaietan aktiboki parte hartuko dugu!", azaldu dutenez.
Berrikuntzak egitarauan
Balore horietan oinarrituz, aurtengo jaiak berrikuntzaz beteta datoz:
- Herri-bazkaria geroz eta herrikoiagoa izango da, bai Sopelan bai Larrabasterran: helburua adin tarte ezberdinak erakartzea da urtero antolatzen den herri-bazkarian. Jauregizar plazan ospatuko da aurten eta ludoteka zerbitzua egongo da.
- Aurten herri-bazkariak beste berezitasun bat izango du: zero-zabor filosofiarekin bat egingo dute eta beraz, ondokoa eskatuko diete parte hartzaileei: etxetik sardexka eta edalontzia eramatea.
- Larrabasterran play back lehiaketa mundiala ospatuko da eta gura duten talde guztiek bertan parte hartzeko aukera izango dute.
- Sopelako jaietan familiarteko jolasak antolatuko dituzte, gurasoek eta euren seme-alabek aktiboki jaietan parte har dezaten.
- Larrabasterran, familia-ginaka, karaokea eta skate ikastaroa izango dute Asanblada Feminista, Peñatxuri eta Ander Deuna Ikastolaren eskutik.
- Larrabasterrako jaiei hasiera emateko, itsasoko izakien kalejira ospatuko dute: marrazoak, surfistak, arrantzaleak, amarratsak, karramarroak... aukera zure mozorroa eta animatu!
- Larrabasterrako pregoia eta txupinazoa Peña Txuri taldeko surfisten eskutik izango da, sardina-jana herrikoia barne.
Iaz bezala, jai koloretsu eta garbien aldeko apustua egin dute, auzokideenganako errespetua eskatuz.
"Azkenik, jaiak goza ditzazuela espero dugu, herriko kaleak, plazak, tabernak eta txosnak umore onez betez. Gora Sopela eta Larrabasterrako jaiak!", adierazi dute Jai Batzordetik.
Jaietako kartelen irabazleak
Programaren aurkezpenean ere aurtengo jaietako kartelen irabazleak nortzuk izan ziren jakinarazi zen.
- Umeen kategorian: Mikel Bonmarito.
- Gazteen kategorian: Marina Landa / Izaro Lizanasoro.
- Sopelako egile baten kartelik onena: Carlos Mezo.
- Sari nagusia eta aurtengo jaietako kartelaren irabazlea: Naiara Etxaiz.
Beraz, jaietako kartel lehiaketaren aurtengo irabazlea Naiara Etxaiz izan da, eta 300 euro eta 200 euroko bonoa jasoko du herriko dendetan xahutzeko.
Sopela eta Larrabasterrako jaiak (pdf)
Sopelako Jai Batzordeak programa herrikoi, partehartzaile eta koloretsua aurkeztu du
Hainbat hilabetez lanean egon ostean, Sopelako Jai Batzordeak aurtengo festen egitaraua aurkeztu zuen larunbatean, ekainak 15. Iaz bezala, Jai Batzordea honakoek osatu dute: Udaleko ordezkariek, herriko elkarteek, koadrilek eta auzokideek. San Pedro jaiak ekainaren 27tik 30era ospatuko dira, eta Karmen jaiak (Larrabasterra), uztailaren 12tik 16ra. Jaietako egitarauan kultur eskaintza zabala izango dute sopeloztarrek: kontzertuak, antzezlanak, umeentzako jarduerak, lehen mailako kirol jarduerak, ekimen partehartzaileak, eta abar, udal iturriek zabaldu dutenez. Batzordeak nabarmendu duen bezala, aurtengo erronka adin guztientzako egitaraua osatzea izan da. Horren adierazle nagusia jaietako pregoia izango da, sopeloztarren hiru belaunaldiren eskutik izango baita: Maria Delia Garai eta Amelia Martin, aurten 100 urte bete dituztela, eta Eguzkilore Dantza Taldeko umeek eta euren gurasoek. Argazkian, jaien aurkezpenean batutako jendea / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun