Autismoa duten pertsonentzako eguneko arreta zentro berria
Apnabik kudeatuko duen Areeta Eguneko Laguntza-zentro berria irekiko da uztailean, irailerako guztiz prest izatea espero dutela. BBK Gizarte Ekintzak lagatako 253 metro karratuko lokal horretan, autismoa duten 18 pertsonek euren terapia okupazionala burutuko dute, talde bakoitzaren beharrizanen arabera sortutako hiru tailerren bitartez.
Zentroaren kokapenak, oinezkoentzako pasealekuetatik eta merkataritza-gunetik gertu, pertsona hauek eguneroko gauzak egiten ikastea erraztuko du: erosketak egiten, igerilekura joaten edo metroa erabiltzen. Lokalak, gainera, arratsaldetan edo asteburuetan familientzako Astialdiko Klubaren funtzioa beteko du.
BBKren Gizarte Ekintzaren ustez, "sozialki berritzailea den zentro bati buruz ari gara, aurretiaz antzeko baliabiderik ez zegoen eskualdeko familiei harrera egitea posible egingo duena, egun egin behar izaten dituzten joan-etorriak murriztuz".
Apnabi elkartea
Apnabi 1970ko hamarkadan jaio zen, gaitz hauek jasaten zituzten familiak batu zirenean, asaldura hauei lotutako arazoak argitu eta duin bihurtzeko. Egun, 700 familia ingururekin lanean diharduen elkartea da, 150 profesionalen eta 14 lan-zentroren bitartez, gaitz honek erasandako pertsonei eta euren familiei erantzun integrala eta arreta pertsonalizatua bermatzeko helburuarekin.
Jon Darpon Eusko Jaurlaritzako Osasun sailburua Areetan izango da bihar, asteazkena, Uribe-Areetako eguneko ospitale berria bisitatzeko. Osasun Sailak zabaldu duenez, bisita goizeko 11:30ean hasiko da, Paulino Mendibil kaleko 3. atariko beheko solairuan. Areetako zentro hori Osakidetzaren Bizkaiko Osasun Mentaleko Sarearen mende dago, eta osasun mentaleko arazoak dituzten pertsonei arreta jarraitua emango diete bertan. Eguneko ospitale berriko instalazioak bisitatu ostean, Jon Darpon Osasuneko Osasun sailburuak eta Carlos Pereira Bizkaiko Osasun Mentaleko Sareko zuzendari kudeatzaileak komunikabideen aurrean hitz egingo dute. Bestalde, ondoko eraikinean, Paulino Mendibileko 5. zenbakiko lonjan, Apnabi Bizkaian autismoa duten pertsonen senideen elkarteak eguneko zentroa zabaltzeko lanetan dabil, uztailean lokala inauguratzeko asmoz. BBKren Gizarte Ekintzak utzi egin die 253 metro koadroko lonja. Argazkian, Jon Darpon Osasun sailburua pasa den apirilaren 7an, Algortako Itxartu kultur elkartearen mendi-taldeak Aixerrota eta Areeta artean antolatutako ibilaldian / cc-by Irekia - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun