Postetxean, hainbat abeslarik grabatu duten abestia eta bideoa aurkeztu eta Gure Esku Dago dinamikaren nondik norakoak azalduko dituzte. "Zergatik erabakitzeko eskubidea? Eskubide pre-politikoa, demokratikoa eta unibertsala delako eta herri honen sentsibilitate guztien elkargunea sortzen duelako", adierazi dute aurreko aurkezpenetan. Izan ere, Gure Esku Dago ekimenaren helburuak "erabakitzeko eskubidearen beharra, aukera eta zilegitasuna gizarteratzea eta herritarrak aktibatzea" dira. "Guzti hori errespetua eta batuketan oinarrituz eta jarrera positibo batekin, gure printzipioak dibertsitatea eta aniztasuna direlarik. Hiru ideiatan oinarritzen dira: nazio bat gara, erabakitzeko eskubidea dugu eta etorkizuna herritarron esku dago".
Gauzak horrela, ostiralekoa eskualdean egingo den hirugarren aurkezpena izango da, hilaren 13an Plentziako Goñi Portalean eta hurrengo egunean Sopelako Kurtzio kultur etxean egindakoen ostean. Besteak beste, Sopelan Zelai Nikolas eta Iñigo Urrutia izan ziren. Jendaurreko aurkezpena egiteaz gain, gonbitea luzatu zuten ekimen horretan parte hartzeko. Azpimarratu zuten ekimenak ez duela inolako dependentziarik alderdi politikoekiko. Haien hitzetan, "euskal herritarrok bermatuta eduki behar dugun gure etorkizuna erabakitzeko eskubidea, oso eskubide garrantzitsua da bakarrik politikoen esku uzteko".
Gure Esku Dago zer den 7 minutu eta erditan azaltzen duen bideoa (cc-by-sa Gure Esku Dago)
Gure Esku Dago abestiaren bideo-klipa (cc-by-sa Gure Esku Dago)
Gure Esku Dago ekimenaren Ficobako aurkezpenerako egindako bideo deialdia (cc-by-sa Gure Esku Dago)
Etzi, ostiralarekin, Gure Esku Dago erabakitze eskubidearen inguruko dinamika herritarra aurkeztuko dute Erandioko Altzaga auzoko postetxe zaharrean. Ekitaldia arratsaldeko 19:30ean izango da. Antolatzaileen arabera, dinamika berri horrek "aniztasuna eta ilusioa" ditu ardatz. Gogoratu dutenez, "bizi dugun momentua kontutan hartuta, nazioa garela eta askatasunez gure etorkizuna erabakitzeko eskubidea dugula lau haizetara zabaltzeko" aurkeztu zen Gure Esku Dago, hilaren 8an, Irungo Ficoba aretoan. Jatorria topatzeko, baina, urte batzuk lehenagora begiratu behar da, 2008ko San Blas egunera, Idiazabalgo Nazioen Mundua ekimena sortu zenean. Handik aurrera, "Gazta zati bat" dokumentalak izan duen oihartzunari esker, Nazioen Mundua ekimenak egin duen lana, Eskozia eta Kataluniako eragileekin izandako harremanak eta eremua Idiazabaldik Gipuzkoako Goierri bailarara handitu izana ezagutzera eman dira Euskal Herri osoan, eta ildo horri jarraituz hainbat herritan erabakitzeko eskubidearen aldeko herritarren dinamika piztu da, Gure Esku Dago sortzera eraman duena. Argazkian, Barrikan bizi den Zelai Nikolas legelari berangoztarra da ekimeneko bultzatzaileetariko bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun