Ekainaren 23an helduko da San Juan jaia. Arbasoengandik ikasitako jentilen usadioari jarraiki, sua izango da udako solstizioari ongi etorria emateko protagonista nagusia. Barrikan eta Leioan bezala, Berangoko Lantzarteko zelaietan neska-mutilen ilusioa ere piztuko dute sugarrek. Zirika Zirkus taldearen eskutik, haurrentzako dantzaldia izango da bertan, 19:30etik aurrera. Ondoren, hurbildutakoen artean txokolatea, "txoripanak" eta sagardoa banatuko dute. Mokadu ezin hobea Xaibor DJak eskainiko duen saiorako indarrak hartzeko. Bitartean, Algortan, Umeen San Juan sua antolatuko dute Gorrondatxe Kultur Elkarteak, Algortako Bertsolari Eskolak (ALBE), Bizarra Lepoan eta Egizu Getxo Euskaldun! elkarteek, UKTESTek eta Zabala eskolako guraso elkarteak. Telletxe plazan izango da, 17:00etatik aurrera, makillaje-tailerra, Tor magoaren ikuskizuna, txalapartarien eta bertsolari gazteen saioa, txokolatea eta kantu herrikoiak izango direla. Getxoko Txorimalo gaztetxean, berriz, Solstizio Gaua ospatuko dute, arratsaldez, prestaketa lanak (18:00), burduntzia eta txokolatada (19:00) eta sua (22:00) eginez.
Sopelan, San Juan sua pizteaz gain, beste hainbat jarduera ere izango dituzte. 21:00etan, ohi den legez, txokolatada herrikoia egingo dute Urkon, Larrabasterran. Horretaz gain, 22:00etan kale antzerkia hasiko da bazterrak alaitzen. Eguna biribiltzeko, tradizioari jarraituz, San Juan sua piztuko dute. Azkenik, Gorlizen, 20:00etan Errementari Bidean eta Gamizen jarri dituzte hitzorduak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun