Jonathan Castroviejok adierazi duenez, "oso ondo sentitu dut nire burua. Bi urte neramatzan bigarrena egiten eta aurten egoera hobean etorri naiz, irabazteko helburu bakarraz". Zirkuitua ere, bere alde zegoela iritzi dio: "erlojupeko nahiko polita izan da, teknikoa, zure indarrak oso ondo neurtzen jakin behar duzulako. Hasieran aldapa gune bat egon da eta hor ezin zara ito. Gero erdialdean haizeak soberan jotzen aritu da eta gogor egin da. Hor irabazi behar zen erlojupekoa, bukaera aldekoa baitzen eta mantendu besterik ez baitzen egin behar".
Gainera, getxoztarrak azaldu duenez, bere lehiakiderik garrantzitsuena zelatan izan dute lehenengo unetik eta horrek lasaitasuna eman dio: "hasieratik izan ditut erreferentziak eta igoeran ondo neurtu dudala eta Luisleren [Luis Leon Sanchezen] marketan nenbilela jakin izan dut. Hortik aurrera pixkanaka-pixkanaka denbora atera izan diot. Dauphine-ko erlojupekoaren ostean konfiantza handia nuen eta gaur erakutsi ahal izan dut. Une onean nago eta Tourrean ere erakustea espero dut".
Jonathan Castroviejo txirrindulari getxoztarrak Espainiako Erlojupeko Txapelketan nagusitu du gaur goizean. Proba Leongo Bembibre herrian jokatu da eta bertako 43,8 kilometroko zirkuitua 54 minutu eta 52 segundotan zeharkatu du Castroviejok, Movistar-eko maillota jantzita. Atsotitzak dioen lez, "Bi ezkero, hiru seguru". Izan ere, aurreko bi txapelketetan bigarren lotu zen getxoztarra. Bestalde, faboritoa zen Luis Leon Sanchez (BLA) bigarren sailkatu da, 55:37ko denbora egin duela. Podioan hirugarrena Ruben Plaza txirrindularia izan da, 56:38 egin ostean. Plaza, Castroviejoren taldekidea da. Hurrengo postuak Jon Izagirre (Euskaltel), Alejandro Valverde, Eloy Teruel eta Jesus Herradarentzat izan dira, azken guzti horiek Movistar taldekoak. Argazkian, Jonathan Castroviejo erdian, Sanchez eta Plaza ondoan dituela / © Movistar.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun