"Lasaitasuna eta erabateko normaltasuna" izan dira San Juan gauaren ospakizunaren ezaugarriak, udal iturri getxoztarren hitzetan, 600 bat pertsona soilik hurbildu zirelako bart Arrigunagako hondartzara, 2012an izan ziren 2.500en, 2011n 3.500en eta 2010ean 7.000en aldean. 30 bat litro alkohola atzeman dituzte; ez da alkohol-intoxikaziorik izan eta ez da inolako osasun zainketarik behar izan, gaineratu dutenez. Halaber, ez da istilu aipagarririk gertatu. Arratsaldean eta gauean udalerriko beste toki batzuetan izan ziren gainontzeko ospakizunak eta suteak ere normaltasun osoz joan ziren. Bai hondartzetan, bai inguruko kaleetan burututako ez ohiko garbiketa normaltasunez egin da eta guztira 20 tona hondakin batu dituzte hiru hondartzetan, hau da Arrigunagako, Areetako eta Ereagako hareatzetan. Hirurak goizeko 9:30etarako prest egon dira herritarren gozamenerako. Garbiketa lanetan 30 langilek eta garbiketako makina bereziek hartu dute parte. Argazkian, aurreko San Juan gau bat Arrigunagan, artxiboko irudian / © Getxoko Udala.
“Pozik gaude San Juan jaia normaltasun eta lasaitasun osoz joan delako, Euskadiko beste toki askotan bezala, besteak beste, Udaltzaingoak eta Ertzaintzak martxan jarritako jardun bereziari, auzokideen aldeko udal neurriei eta, baita ziurrenera moda aldaketari esker ere. Familien jaiaren zentzua berreskuratu dugu, gaztetxoen eta familien partaidetzarekin, gainera kultura desberdinetakoen familiekin, gure udalerriaren aniztasunaren adierazgarria dena”, adierazi du Josu Loroño Komunikazioko zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun