Getxoko Ezker Abertzaleak gogoratu duenez, oso entzutetsua izan zen Iñaki Zarraoraren gidaritzapean 2001ean EAJk esku artean izan zuen egitasmoa, Getxo aldean 8.000 etxebizitza proiektatzen zituena, helburu nagusitzat udalerriko biztanleri eta etxebizitza kopurua biderkatzea zuelarik. "Herri mobilizazioak tamainako astakeria gelditzea lortu zuen", nabarmendu dute ezkertiarrek.
"Berriz ere, HAPOaren berriskupenean murgilduta gaude eta saudade berriro mahai gainean han eta hemen agertu diren ustezko asmoak: Martiturriko enpresa gunea, etxebitza gehiago eta abar. Ezker Abertzaletik argi daukagu Getxoren etorkizuna zehazteko, Herriak akordatu beharko dituela zeintzuk diren "garapen" bezala ulertzen ditugun oinarriak: biztanlerian handitu nahi dugu? zein zentraltasun eman behar diegu gune berdeei? azpiegitura handiak behar ditugu? auzoen bizitza bermatu behar dugu ala zerbitzuak zentralizatu? zer egin behar dugu etxe hutsekin? aparkaleku gehiago behar dira ala bidegorri sare gehiago? Gizarte akordioaren bitartez finkatutako helburuek eta ez interes politiko-ekonomikoek erabaki behar dute HAPOa", adierazi dutenez.
Herri Antolakuntzako Plan Orokorraren (HAPO) berriskupenean mugilduta dago Getxo udalerria. Horren arabera, etxeak, berdeguneak, garraio sareak, kultur azpiegiturak zein jarduera ekonomikorako guneak zeintzuk izango diren zehazten da; datozen 10 urteetan gure herriak izango duen bilakaera definitzen da, "gure bizimodua eta eguneroko harremanak erabat baldintzatuko dituena", tokiko Ezker Abertzaleak adierazi duenez. Horrekin batera, Udalak "parte hartze" prozesua zabaldu barri du, "hasieratik argi utziz handik lortutako emaitza ez duela inolako betearazpen mailarik", alderdi politikoak salatu duenez. Horregatik, horren inguruko interesa duen pertsona, elkarte zein eragile oro bildu eta "benetako herri eztabaida parte hartzailea abiarazteko hazia erein" nahi du Getxoko Ezker Abertzalea, "orain 12 urte bezala, gaur egun ere argi dugulako ezkutuko interesak eta aldez aurretik idatzitako Planak ditugula mahai gainean eta horiek herri indarrez gelditu daitezkela soilik". Gauzak horrela, bihar, asteazkena, arratsaldeko 7etan, Algortako Villamonte kaleko kultur etxera hurbiltzera deitu ditu herritarrak. Eztabaidan Jose Allende EHUko ekonomia katedradunak, Ula Iruretagoiena EHUko ekonomia irakasleak eta Ezker Abertzaleko kide batek parte hartuko dute. Argazkian, 2010eko abenduaren 18an, 150 bat herritarrek egin zuten Lurralde Zati Planaren (LZP) kontrako martxa Getxoko Bentatik Azkorrira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun