Extreme Man zirkuitua osatzen duten lau probetako bigarrena da biharkoa, eta Getxoko Udalaren aburuz, "ziur aski", kirol modalitate horretako Estatu espainoleko "urteko probarik garrantzitsuenetakoa izango" da, bertan parte hartuko baitute diziplina horretako izar handienetako batzuk. Baina elite mailako zerrenda ikusgarri horretakoez gainera, ehunka triatleta herritarrek ere hartuko dute parte. Ikuskizuna, hortaz, bermatuta dago.
Juanan Fernandez lasterketaren sustatzailearen arabera, “zirkuitua kirola baino zertxobait gehiago da, balio sozialak, kulturalak, eta abar ere badituelako, eta kirol-turismoaren aldeko apustua egiten du, sektore hori dinamizatzen du, eragin ekonomikoa oso garrantzitsua sortuz”. Halere, balio kulturak horiek ez dira arrazoi nahikoa izan webgunean euskarazko bertsioa sortzeko.
Nobedadeak zirkuituan
Aurten aldaketak izango dira probaren antolaketa esparruan eta zirkuituari dagokionez. Helmuga eta "boxe"-ak lekuz aldatuko dituzte. Horiek kirol portuko sarrerako biribilgunetik Tamarisesera doan tartean kokatuko dituzte (Arriluzeko bide-tarte zuzenaren ordez), antolatzaileen iritzian, aldaketa horrekin proba arteko trantsizioak, boxen erabilera eta helmugaratzea hobeto ikusiko dituelako jendeak (Begoña jauregiaren azpian harmaila jarriko dute).
Lasterketa Ereagako hondartzan hasiko da 08:00etan eta 113 kilometroko distantzia izango du –hiru espezialitateetako distantziak batuz ateratzen den zenbakia–, honako modu honetan banatuta: 1,9 km-ko igeriketa proba (Ereagako hondartzan), 90 km-ko bizikleta zirkuitua (itzuli 1, iazko 2ren ordez, Leioa, Erandio, Berango, Sopela, Urduliz, Plentzia, Mungia eta Laukiz ere zeharkatuko dituen zirkuituari) eta 21,1 km-ko korrikaldia ( 2012ko 3ren ordez, 2 itzuli Portu Zaharra eta Bizkaiko Zubi arteko 7 km-ko zirkuituari, itsasoko pasealekuan zehar). Lasterketa 16:00 aldera amaituko da, ordu horretan iritsiko baitira azken kirolariak helmugara.
Zirkulazio neurriak Triatloia dela eta
Txapelketa antolatu ahal izateko zirkulazioan eta aparkamenduetan eragina izango duten neurriak hartu beharko dira. Izan ere, igandean sarbidea itxita egongo da. Kirol portuan goizeko 11:00ak arte sartu ahal izango da eta 15:30ak arte ezin izango da irten. Halaber, ezin izango da aparkatu Lezama Legizamon jauregiaren aurreko aparkalekuan. Udalak barkamena eskatu du sor daitezkeen eragozpenengatik.
Bihar, igandearekin, goizeko 8etatik aurrera 490 kirolari lehiatuko dira "Extreme Man 113 Getxo-Basque Country" izen ingelesa duen triatloiaren bigarren edizioan. Gizonek 8etan Ereaga hondartzatik abiatuta, emakumeek 8:10ean eta errelebo taldeek 8:20ean, 113 kilometroko ibilbidea zeharkatuko dute. Izan ere, igeriketa saioa izango da lehen proba Ereagan. Bertan, triangelu formako ibilbidea izango da, denera 1,9 kilometrokoa. Transizioaren ondoren, bizikleta saioari ekingo diote, 40 kilometroko 2 itzuli eman beharko dituztela Getxo, Berango, Sopela, Urduliz, Plentzia, Lemoiz, Bakio, Maruri-Jatabe, Gatika, Leioa eta Laukiz udalerriak igaroko dituztela. Ondoren, oinezko saioari aurre egingo diote, Ereaga eta Areeta arteko 7 kilometroko ibilbide bati 3 itzuli emanez. Parte hartzaileen artean izango dira Marcel Zamora, Gurutze Frades, Raul Amatriain, Albert Moreno, Martin Fiz, Joseba Beloki eta Mikel Elguezabal kirolari ezagunak. Aldiz, iragarrita zegoen Virginia Berasategik ez du azkenean parte hartuko, maiatzean Bilboko III triatloian izateko debekatutako sustantziak hartu zituela pasa den astean aitortu ostean. Argazkian, Gurutze Frades kirolari iurretarra / © Gurutze Frades.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun