Europako Legebiltzarreko Eskaeren Batzordeak Bizkaiko Zubiaren segurtasunaren inguruko azalpenak eskatu berri ditu, EITBk zabaldu duenez. Horren arabera, 2010eko irailaren 8an istripu batean hil zen Mikel Alexander Uriarte Gonzalez 22 urteko gaztearen gurasoek egindako salaketaren harira EBko batzorde horrek kezkatuta agertu eta gutun bat helarazi dio El Transbordador de Vizcaya SLri, "zubiaren egoeraren gaineko zehaztasunak" eskatzeko, Uriarteren gurasoek jakinarazi dutenez. Gutun horretan, batzordeak Bizkaiko Zubiaren segurtasun neurriek Europako araudia betetzen duen edo ez jakiteko azalpenak eskatu ditu. Hala, enpresak "bideko azpiegituren segurtasun neurrien, eraikinaren parametroen, eraikuntzarako erabilitako materialen eta irisgarritasunaren" inguruko zehaztasunak eman beharko ditu. Mikel Uriarte zenaren ama Eskaera Batzordeko hainbat eurolegebiltzarkiderekin bildu zen martxoan, zubian segurtasun nahikorik ez dagoela salatzeko. Argazkian, Uriarteren lagun bat transbordadorea itxaroten, sinadurak biltzeko asmoz.
Uriarte Ibaizabalgo uretan hil zen, zeraman autoa ibaira erori ostean. Gurasoen aburuz, transbordadorearen zorua egoera txarrean zegoelako eta zubiaren barrerek ez zutelako inolako segurtasunik bermatzen. Enpresaren ustez, ordea, Uriartek larregizko abiaduraz hartu zuen zubia. Barakaldoko Instrukzio Epaitegiak kudeatzen duen auzia dela eta hainbat aldiz izan dira adituak zubian, zenbait proba egiten. Hamaika izan dira ere hildakoaren lagunak eta senideak bertaratu direnak, segurtasun neurriak gogortzeko eskaera egiteko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun