PuntuEus
.eus domeinua Euskal Kulturaren Komunitateak eta Euskarak Interneten duten izena da, kultura-aniztasun horren baitan gaur egun Interneten duten aterpe teknologiko propioa. .eus domeinuak euskara lehen mailako hizkuntza bihurtuko du Interneten, mundu mailako aitorpena eskainiko baitio eta hura sustatzeko bitarteko eraginkor bihurtuko baita.
PuntuEus elkargoa 2008ko apirilaren 2an ofizialki sortu zen eta, gaur egun, 58 elkartek, kolektibok eta Kontseilua, Euskaltzaindia, Euskaltel, EHU, CAF, Ikastolen Elkartea, Topagunea, Gerediaga, Elkar, EiTB, AEK eta Emakunde bezalako erakundeek osatzen dute. Urte batzuetako lanaren ondoren, azkenekoa ebaluazio fasekoa, ICANN-Internet Corporation for Assigned Names and Numbers erakundeak, irabazi asmorik gabeko nazioarteko erakundeak IP helbideak esleitzeaz eta domeinu izenen sistema kudeatzeaz arduratzen denak, 2013ko ekainaren 14an Euskara eta Euskal Kulturaren Komunitatearentzat .eus domeinua onartu zuen.
Getxoko Udalak euskara eta euskal kultura sustatzeko onartu berri den PuntuEus domeinuari atxikitzeko prozesua hasiko du. Gauzak horrela, 2014ko apirilean indarrean sartzea espero den domeinua baliatzeko asmoa agertu du erakundeak. Ordutik aurrera, harreman elektronikoetan erabiltzen diren paper guztiak mailaka aldatuz joango dira, horrela kostua zero izanik. Egun, Getxo.net erabiltzen du Udalak. Imanol Landa alkatearen aburuz, “.eus domeinua euskal komunitateak konkistatu espero duen esfera teknologiko berrirako irteera eta sarbidea izango da, euskara zortzigarren lurraldea bihurtuko duena. Munduan leku bat lortzean datza eta .eus herriaren eraikuntzan, euskararen hedatzean eta Euskadi Interneten agerikoagoa izateko sarbide bat eskaintzen digu”. Landak kulturako, industriako, merkataritzako eta elkarteko sektore guztiak ekimen horri atxikitzera gonbidatu ditu, “guztion artean sare globalean Euskadi kokatzeko sare trinko bat lor dezagun”. Argazkian, pasa den ekainaren 15ean PuntuEus fundazioak egindako agerraldia / © PuntuEus fundazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun