Getxoko Alderdi Popularrak Areetako Zugatzarte etorbideko 8. zenbakian duen egoitza bart gauean erasotu dute, PPk salatu duenez. Gaur goizean, Marisa Arrue udal talde popularraren bozeramaileak Ertzaintzaren Neguriko komisariara jo eta ezezagunen batek egoitzaren aurka hormigoizko pieza bat bota duelako salaketa jarri du. Arruek azaldutakoaren arabera, jaurti duten harriak 30 zentimetroko luzera eta 10eko zabalera dauzka eta kanpoaldean zegoen hodi fluoreszentea apurtu du. Popularren arabera, gauekoa azken bi hilabetetan jasan duten bigarren erasoa da, maiatzaren 8an "beste ezezagun batzuek ateko marmolaren eta segurtasun kameren aurka ekin" baitzuten. Arruek adierazi duenez, "ez dakigu nork egin du erasoa baina dena dela ez gaitu kikilduko. Orain arte bezala jarraituko dugu lanean". Ildo berean, Ertzaintzaren esku utzi dituzte ikerketa eta gerora etor litezkeen ekimenak hartzea. Gaur goizean "frogak eta arrastoak" batu dituzte ertzainek Areetako lokal popularrean. Argazkian, argiterian izandako kaltea / © Getxoko PP.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun