Arratsaldean piztuko dute Armintzako jaietako txupina

BIhar Larrabasterran egingo duten bezala, Armintzan gaur arratsaldeko 6:30ean txupina jaurtiz ekingo diote Karmenak ospatzeari. Auzoko jaiak Ama Birijinaren egunera arte, asteartera arte, luzatuko dira, tartean aspertzeko betarik ez dela izango. Diru eskasiari aurre eginez, jai batzordeak egitarau potoloa eta adin zein gustu guztientzakoa prestatu du aurten, Txapel Reggae jaialdiaren 23. edizioa barne. Besteak beste, gaur triatloia, otarrainxka jana eta txantxa jolasak umeentzak izango dira. Ostiralean, ordea, Mozorro Eguna izango dute, jan-edana nagusi izango dela. Izan ere, eguerdian tabernen arteko pintxo lehiaketa izango da, arratsaldean tortilla eta potxa txapelketak eta gauean matxakaoen lehiaketa. Gauera dantzaldia, patata-dantza eta tanga lasterketa direla medio sartuko dira. Larunbatean skaterren txanda helduko da, baita Orabai perkusio taldearena, zirkoarena edota Txapel Reggaerena ere. Igandea egun lasaiagoa izango da, playback eta film laburren emanaldia tarteko. Astelehena izango da umeentzako jarduerarik izango ez duen egun bakarra eta asteartean ohiko amama eta aitxitxeentzako hamaiketakoz gain, "bizirik dirautenentzako poteoa" ere izango da, meza aurretik. Gaueko 11etan entzungo da Armintzako azken traka. Argazkian, New York Ska Jazz Ensemble AEBko taldea izango da Txapel Reggaeren protagonistetako bat / © Brixton Records.