BBVAko 275 bezero euskaldunek bankuari ahozko zein idatzizko zerbitzuan euskararen erabilpena bermatzea eskatu diote. Ekimena BBVAko LAB sindikatuak abiatu du Bizkaiko eta Gipuzkoako zenbait bulegotan. Izan ere, sindikatuak gogoratu duenez, "euskara eta eguneroko lana uztartzeko LABek aspalditik burutzen ditugun ahaleginen segida da eskakizun bilketa hau, aspaldikoak baitira LAB sail sindikalak bankuari euskararen normalizazioa lortzeko bidean helarazitako eskaerak. Azkenak aipatzeko, 2008an BBVAn Euskara Saila sortzeko egindako eskaera ofiziala, beste sail sindikalekin batera, eta 2010ean bankuko bertako hainbat langilek enpresarekiko harremanak euskaraz izan daitezen eskatuz sinatutako kartak. Baina gai honetaz gorreria gaitzak jota baleude bezala jokatzen du bankuak, eta inolako erantzunik ez dugu jaso orain arte", salatu dutenez. Argazkian, BBVAko politika ekonomikoa salatzeko Areetako bulegoan egindako baraualdi baten irudia / © Ez Irentsi.
Bost urteko eskakizunen ostean, "BBVAk euskararekiko azaltzen duen axolagabekeria" salatu du LABek. Sindikatuaren ustez, bankuak ez du betetzen "ezta 2008an Eusko Jaurlaritzak indarrean jarritako dekretua ere, non banketxeetako erabiltzaileei hizkuntza eskubideak aitortzen zizkien eta enpresei betebehar zehatzak ezartzen zizkien". Langileek zabaldu dutenez, "BBVAk ere ganorazko ahalegin bat egin behar du euskararekiko gutxieneko baldintzak betetzeko. Horretarako, beharrezkoa da Euskara Saila sortu eta bultzatu bankuko organigraman".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun