Atari digital berrituan, albistegiaz, argazki eta bideo galeriez gain, hainbat osagai jarri dituzte, eta berriki Euskal Herriko 685 udalerrien atala zabaldu dute, informazio eta zerbitzu modura. Izan ere, Udalbiltzaren ustez, "Euskal Herriaren desegituraketaren ondorioz, duela urte batzuk arte ez zen erraza jakitea gure nazioan zenbat herri dauden. Egun, haiei buruzko informazio xehetua izateko aukera dago. Beraz, Udalbiltza sarearen bitartez ere nazioa egiten ari da".
Honako hauek dira udalerri bakoitzaren inguruan webguneak zabaltzen dituen datuak: Udalerriaren izen legala eta euskarazko izen ofiziala ("Sopelana / Sopela" dakar, adibidez), dagokion herrialdea, udalerrien kokapena kode eta lizentzia askean komunitateak egindako Open Street Map izeneko mapan, biztanleria, herriaren azalera, dentsitatea, errepide bidezko distantziak lurralde hiriburura, haur eta lehen hezkuntza azpiegitura gertuenera, osasun zentroetako eraikin gertuenera, txikizkako merkataritza establezimendu gertuenera, euskarazko eskaintza duen eskola gertuenera edota euskaltegi gertuenera. Jakina, ezin falta udaletxeko helbidea, telefonoa, faxa, webgunea, legealdiko hautetsien zerrendara esteka eta herriko udalbiltzakideen atalera esteka.
Beste zerbitzu batzuk
• Euskal Herriari begira ataria. Eskaintza zabala du, lurralde datuak eta grafikoak jasotzen baititu. Horren sustapen kanpaina udazkenetik aurrera egiteko asmoa du Udalbiltzak.
• "Zer da Udalbiltza?" atala. Udalbiltzaren historia labur bat, bideoekin osatua.
• "Udalbiltzakideak" atala (atxikitzeko aukerarekin), eta hilero berritzen duten udalbiltzakideen zerrenda (1.422 udalbiltzakide zeuden ekainaren bukaeran).
• Edonork Udalbiltzari ekarpena egiteko aukera, formulario baten bidez.
• Udalbiltzaren lehentasunak, Nazio Gobernua eta funtzionamendua ere agerian jarri dituzte.
• Udalbiltzaz esandakoak sartu dituzte.
• Udalbiltzaren aurreko aroko egitasmoak ere irakurgai dira.
• "Adierazpenak" atalean, Udalbiltzak ateratako agiriak sartu dituzte, zerrendan.
Web gunea euskaraz ez ezik espainolez zein frantsesez dago. Bestalde, sare sozialetan ere presentzia du Udalbiltzak, Twitter-en (1.100 jarraitzaile uneotan) eta Facebook-en.
Mertxe Aizpuruak zuzentzen duen Udalbiltza Euskal Herriko udal eta udal hautetsien biltzarrak bere web gunea osatu egin du azken egunetan, "sarearen bidez ere nazioa egiteko". Besteak beste, Euskal Herriko udalerri guztien (685) informazio xehetua ipini du irakurgai. Udalbiltzak berak iragarri duenez, sarean egin duten beste berrikuntza bat Udalbiltzari ekarpena egiteko aukera zabaltzea izan da, edonork egin ahal izango duela. Erakundeak jakinarazitakoaren arabera, "Udalbiltza da Euskal Herri mailako instituzio bakarra, eta sortze beretik du gure nazioa zertan den jakitea eta zabaltzea. Joan den martxoaren 2an egin zuen berrantolaketarako batzarra, eta harrez geroztik web gune berria du: udalbiltza.info. Halere, Udalbiltzak dagoeneko erabaki du datorren urtean, ahal bezain laster, .eus domeinua erabiliko duela, Getxoko Udalak aurretik onartu bezala. Argazkian, Maitane Nerekan Umaran Getxoko EH BIlduko zinegotzia da Udalbiltzaren Nazio Gobernuan Uribe Kostak duen ordezkari bakarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun