Jaiegun honek badu bitxikeria bat: haitzek eta baselizak Santa Marina izena badute ere, gurtzen den santua Santa Liberada da. Bere irudia urte osoan dago Urdulizko Andra Mari elizako sakristian gordeta, eta hilaren 20an beren-beregi ateratzen da bertatik, baselizara igotzeko eta meza nagusiaren buru izateko. Diotenez, Santa Liberada, Santa Marina eta beste zazpi ahizpa santu batera jaio ziren, erditze berean, Baionan, II. mendean. Agian horrexegatik, Santa Liberada haurdunen eta erditze onen zaindaritzat hartzen da. Hori dela eta, haurdun dauden emakumeek berari egiten diote otoitz.
Urtero bezala, hainbat ekitaldi burutuko dira uztailaren 20an ospakizun honen harira: hamaiketakoa, dantza saioa, txokolatada... eta jakina, tortila lehiaketa, izan ere ohi bezala burutuko da, lehiaketa bi kategoriatan banatuz: 16 urterarte eta 16 urtetik aurrera. Parte hartzaileek hurrengo osagaiak bakarrik erabili ditzakete tortilak egiteko: patatak, arrautzak, olioa eta gatza. Honez gain, esan beharra dago, jardunaldiari bukaera ezin hobea emateko Egan taldearen emanaldia izango dela gaueko 22:00etatik aurrera Antsonekoa enparantzan.
Urduliztarren egitaraua
11:30 Eliz aurretik Santa Marina baselizaraino igoera udal agintariekin batera, txistulariak jai lagun izanda.
12:00 Meza nagusia eta ohorezko aurrezkua.
12:30 - 13:00 Tortila leheiaketarako izena ematea.
13:00 Hamaiketakoa, fanfarriarekin alaituta.
14:30 Tortilen aurkezpena.
18:00 Santa Marinetik Antsonekoa enparantzaraino jaitsiera, buruhaundi eta honako dantza taldeekin:
Ikusgarri (Portugalete) / Agurra (Algorta) / Iratxo Gorria (Urduliz). Ondoren dantza taldeen erakusketa Antsonekoa enparantzan.
20:30 Tortila lehiaketaren sari banaketa.
21:00 Txokolatada.
22:00 Eromeria eta Musika Kontzertua Egan taldearekin, Antsonekoa enparantzan.
Sopeloztarren plana
Eguerdiarekin batera, hamaiketakoaren txanda helduko da, eta oraindino gosea ase ez dutenek herri-bazkaria izango dute, 14:00ak aldera. Azkenik, 16:00etan tortilla txapelketa izango dute, eta horren ostean eguna biribiltzeko Dangiliske taldeak erromeria emango du.
Taxi zerbitzua, debalde
Jaigunera heltzeko erraztasunak emateko helburu, Sopelako Udalak auzokideen eskura taxi zerbitzua jarriko du debalde, Fernando Ansoleaga parke ingurura heltzeko aukera emanez. Aipatu zerbitzua herriko taxistek eskainiko dute, Sopelako Udalarekin akordioa lortu ostean, eta honako ordutegia izango du: goizeko 10:00etatik 11:00ak arte hilerriko ataritik parkeraino eta goizeko 12:00etatik 13:30ak arte parketik hilerriko atariraino.
Zerbitzu horri esker, mugikortasunean arazoak dituzten auzokideek Santa Marinara heltzeko aldapa saihestu ahal izango dute. Autoek ezin izango dute parkea inguratzen duten landetan aparkatu, eta Garden Centerreko aparkalekua erabili beharko dute. Gero, beharra izatekotan, taxi zerbitzua izango dute eskura.
Urtero legez, Santa Marina edo Santa Mariñe eguna ospatzen dabiltza sopeloztarrak zein urduliztarrak baselizaren inguruan. Gaur, baselizako inguruak zein Urdulizko kaleak ohiko jai-giroan murgilduko dira, izan ere, ospakizun hau urduliztarrek gehien maite duten jaietako bat da. Ume zein helduak haitzetaraino igotzen dira, Santa Liberada gurtzera. Modu horretan, jaiak eztanda egiten du, eta jende ugari biltzen da herrian. Izan ere, aspaldi-aspalditik, debozioa eta jai-tradizioa eskutik helduta doaz Santa Marina egunean; hain aspaldiko jaia da, inork ez baitaki ze urtetan hasi zen ospatzen. Halere, ondoko herrian, Sopelan, finago ibili dira edo, gutxienez, lehenago esnatu. Izan ere, bertan goizeko 10etan bota dute txupina udaletxetik eta Barinatxe taldeko txistulariekin batera, kalejira irten dira baselizara arte. Mezaren ostean, 11:30ak aldera, ohorezko aurreskua eta lore eskaintza ere egin dute Fernando Ansoleagaren omenez. Ordu horretan batu dira Andra Mari elizan urduliztarrak haiek ere baselizara kalejiran abiatzeko. Eguerdian batuko dira bi herriak Santa Mariñeren inguruetan nork bere egitaraua izango duela. Sopeloztarrek, baina, taxiz heltzeko zerbitzua ere jarri dute. Argazkian, Sopelako Udalak antolatutako ohorezko aurreskua Santa Mariñe egunean / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun