Azken datuen arabera, egun 599 preso politiko daude 79 espetxetan sakabanatuta. Euskal Herrian hamar soilik daude. Preso kopururik handiena euren etxeetatik 800-900 kilometrora dago, eta ondorioz, senideek "1.300 kilometro inguru egin behar izaten ditugu astebururo". Sakabanatze horrek "tentsioa, neke izugarria eta izugarrizko" ondorio psikologikoak eragiten ditu. "Ondorioak askotarikoak izan daitezke", diote, "baina lazgarriena heriotzarena da". Izan ere, errepidean hamasei senide eta lagunek bizitza galdu dute. Tartean, Anjel Figueroa algortarra zenaren amama, Antxoni Fernandez, 1997ko martxoaren 14an Alcala Mecora bisitan zihoazela.
Sakabanaketak eragiten duen beste ondorioekin jarraiki, ekonomikoa ere gogoratu du Etxeratek. Elkartearen datuen arabera, astebururo "batez beste 377,94 euroko kostua" eragiten die familia bakoitzari; urtean, 19.653 euro.
Bihar, igandea, "Senideak izateagatik zigortuak. Etxean nahi ditugu!" lelopean, jende katea egingo dute Plentziako hondartzan. Etxerat elkartearen ekimena goizeko 12etan abiatuko dute Plentziako metro geltokian, bertatik hondartzara joan eta euskal preso politikoen sakabanaketa eta politika horren ondorioak, tartean auto istripuak eta heriotzak, salatzeko. Uribe Kostako hiribilduaz gain, salaketa Laida, Zarautz, Donostia eta Hendaiak ere hartuko dute. Izan ere, biharko mobilizazioaren bidez, gatibuen senitartekoek pairatzen dituzten ondorioak zabaldu nahi dituzte. Etxeraten ustez, presoen sakabanaketa eta horren ondorioak ez dira senideen erantzukizuna, "ezarri" egiten dieten "behar bat" baizik. Hori dela eta, "gogor" kritikatu dute Angel Yuste Espetxe Erakundeetako idazkari nagusiak ekainaren 25ean Espainiako Kongresuan esandakoa, sakabanaketaren ondorioz gertatzen diren errepide istripuen erantzukizuna presoak bisitatzera joaten direnei leporatu zienean. Argazkian, Etxerateko kideek 2009an antolatutako Dispertsioaren Aurkako Birak Algortan egindako etapa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun