Ustezko lapurra atxilotzea ekarri zuen gertakaria joan den astelehenean izan zen Sopelako Atxabiribil hondartzatik gertu. Bi emakume banku batean eserita zeuden, eta auto bat haien aurrean gelditu zen. Bi lagun zeuden barruan. Bi gizonak ibilgailutik jaitsi ziren, eta aparkatuta zeuden beste ibilgailu batzuk ikuskatzen hasi ziren, barruko objektuak lapurtzeko asmoz. Bi emakume zeudela ohartuta, gizonetako batek galtzak jaitsi zituen eta genitalak erakutsi zizkien, alde egin zezaten.
Emakumeek mugikorrarekin argazki bat ateratzen ari ziren plantak egin zituzten, eta Sopelako udaltzainengana jo zuten gertatutakoa salatzeko. Salaketa egin behar zutenean, inplikatuetako bat agertu zen; gertatutakoa argitu nahi zuen. Identifikatu ondoren, gizonak poliziaren egoitzatik alde egin zuen, baina ertzainek susmo txarra hartu zioten. Handik g utxira, udaltzainek bere ibilgailua aurkitu zuten eraikinetik gertu. Autoa gaizki aparkatuta eta irekita zegoen, eta larrialdiko argiak piztuta zeuzkan. Agenteek barrualdea ikuskatu zuten, eta maletategia objektuz josita zegoela ohartu ziren. Gainera, egiaztatu zuten antzeko ibilgailu bat kostaldeko hainbat gunetan egindako lapurretetan inplikatuta zegoela. Udaltzaingoak horren berri eman zion Ertzaintzari, eta azken hori arduratu zen ikerketaz.
Ustezko lapurra hurrengo egunean atxilotu zuten; harrigarria badirudi ere, Udaltzaingoaren egoitzara itzuli zen bere ibilgailua jasotzera. Une horretan, ertzainek atxilotu egin zuten; izan ere, autoaren barruan aurkitutako objektuak kostaldeko hainbat gunetan aparkatutako ibilgailuetan egindako lapurreten harira azken bi hilabeteetan aurkeztutako hainbat salaketarekin erlazionatuta zeuden.
25 urteko atxilotua ertzain-etxera eraman zuten. Beharrezko eginbideak egin ondoren, epailearen esku jarri zuten. Hark atxilotua Madrilgo barneratze-zentro batean sartzeko agindu zuen, laster kanporatzeko. Ertzaintzak atxilotuarekin batera zihoan bigarren inplikatua identifikatzea lortu du. Hura ere inputatu egin dute, lapurretan ustez parte hartzea leporatuta.
Gizon bat atxilotu dute Sopelan aparkatutako autoetan eta etxebizitzetan lapurtzea egotzita
Ertzaintzak 25 urteko gizon bat atxilotu zuen joan den asteartean Sopelan, Kantauri itsasertzeko hainbat gunetan aparkatutako autoetan eta etxebizitzetan lapurtzea leporatuta. Eusko Jaurlaritzaren Segurtasun Sailak zabaldutakoaren arabera, poliziek lapurtutako hainbat objektu aurkitu zituzten atxilotuaren autoan. Sopelako Udaltzaingoaren egoitzan atxilotu zuten ustezko lapurra, bi emakumerekin izandako gertakariaren ondoren, abandonatuta utzi zuen ibilgailua hartzera itzuli zenean. Atxilotua barneratze-zentro batera eraman zuten, laster kanporatzeko. Bertsio ofizialari jarraiki, Getxoko ertzain-etxeko Guardiako Ikerkuntza Kriminaleko Unitateko agenteek ikertutakoari esker, atxilotua inputatu egin dute azken hilabeteetan Kantauri itsasaldeko hainbat gunetan gutxienez hamar lapurreta egitea leporatuta. Horietatik bederatzi aparkatutako ibilgailuetan egin omen zituen eta bat etxebizitza batean. Ertzaintzak lanean dihardu, atxilotuaren ibilgailuan aurkitutako zenbait objekturen jatorria zehazteko. Izan ere, ez daude aurkeztutako salaketekin erlazionatuta, eta, hortaz, baliteke lapurreta gehiagotan parte hartu izana. Atxilotuak ibilgailuak bortxatzen zituen, eta objektu baliotsuak lapurtu, Segurtasun Sailaren hitzetan. Zenbaitetan, jabeen etxebizitzetako giltzak lapurtzen zituen, eta, ondoren, horietara joaten zen lapurtzera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun