Produktuen aniztasuna eta kalitatea izan dira aurten ere San Lorentzoko azokaren ezaugarri nagusiak, tokiko arduradunen arabera. Barazkiak, txerrikiak eta ahatekiak, lekaleak, txakolina, euskal pastela, tradiziozko okintza, gozokiak, landareak eta loreak, gaztak, eztia eta beste hainbeste produktuak egon ziren salgai merkatuan. Ohikoa denez, Euskal Herri osotik etorritako ekoizleek etorri ziren Algortara bere salgaiekin.
Barazki, landare eta gazta lehiaketak
Eguerdian ekoizle askok espero zuten momentua ailegatu zen, epaimahaiak barazki, landare eta gazta lehiaketen emaitzak jakinarazi baititu. Aurten, barazki lehiaketan, Urdulizko Adela Andikoetxeak irabazi du. Landare lehiaketari dagokionez, Usurbilgo Aranburu hazitegiak atera dira garaile. Azkenik, Gazta lehiaketan, Markina-Xemeingo Floren eta Igor Txurrukaren Barroeta Gazta saltokia nagusitu da.
19.000 lagun egon dira aurten Algortako San Lorentzo azokan, Getxoko Udaleko iturriek adierazi dutenez. Bisitariek jaiaz eta baserri produktuez gozatzeko aukera izan zuten larunbatean. 46 ekoizleen 52 saltoki bildu zituen azokak. Iaz bezala, postuak Biotz Alai eta San Nikolas plazetan banatu ziren. Urtero moduan, amaiera ezin hobea eman zion egunari Biotz Alai abesbatzak 22:00etan izen bereko plazan eskaini zuen saioan. Ohi bezala, azoka 10:00etan hasi zen baina, ordu hori baino lehenago, lehenengo bisitariek gain-begirada ematen hasi ziren eguneko lehenengo erakusketak egiteko asmotan. Handik ordubetera, erosleek azokaren bi salmenta guneak bete egin zituzten. 14:00etara arte, etengabe egin ziren salmentak. Bestalde, bertoko trikitilari taldeei eta aurten jarri diren hiru txosnei esker, jai giroa nagusi izan zen azokan. Hori guztia, eta goizean izan zen eguraldi ona ezinbestekoak izan ziren giro itzela lortzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun