Kontzertu nagusiak hilaren 5ean, ostegunean, hasiko dira, Kepa Junkeraren eta Budiñoren eskutik. Bi artistek ikusleengana intentsitate handiko esperientziak eta emozioak hurbildu nahi dituzte. Bigarren egunean, musika zeltan eta New Agean aztarna gehien utzi dituen banda irlandarra egongo da, zaleentzat erreferentzia eztabaidaezina bihurtu dena: Clannad. 7an, larunbatean Yacine & The Oriental Groove kultura anitzeko ariko da Getxon. Bandak mendebaldeko, ekialdeko eta Magrebeko musikak bildu eta “fusio mediterraneo” moduan definitu daitekeen musika egiten du, publikoa dantzatzera animatzen duena (izan ere, saio horretan 512 eserleku izango dira eta gainerakoak, zutik egotekoak). Amaitzeko, agertoki nagusiko programa ixteko, “Kukai & Lagunak” ikuskizuna aurkeztuko dute. Kukai dantza-taldeak euskal dantza tradizionala eta beste dantza-estilo batzuk eta ikuskizun horretarako gonbidatutako artisten musika konbinatuko ditu.
Arratsaldeko kontzertuetan, ikusleek askotariko programaz gozatu ahal izango dute. Thalassa hirukoteak, musika klasikoa oinarri hartuta, herri-konposizio mediterraneoen errepertorioa eskainiko du; Mariachi Imperial Elegancia Mexicana taldeak corridoak, boleroak eta baladak aurkeztuko ditu; Trivium Klezmer-ek herri-musika juduan errotutako erritmoak hurbilduko ditu, eta Ana Alcaidek tekla-biolarekin aspaldiko musiken mundura hurbilduko gaitu. Munduko Terrazan, Tazzuff taldeak erritmo tradizionalen eta jazz, flamenko eta errunba soinuen fusio freskagarria interpretatuko du, eta Getxoko Dead Bronco boskoteak "broncobilly" eskainiko digu, rock, country, folk, punk eta EEBBetako musika-erroekin lotutako beste soinu batzuen nahastea.
Goizeko kontzertuetan, txikiek eta handiek bi emanaldi izango dituzte, lehenengoa Titiriteros de Binéfar taldearen eskutik. Taldea Getxo udalerrira itzuli da herri-musikaren, txotxongiloen eta jolasen konbinazio jostagarri eta berezia eskaintzeko. Kontzertuaren aurretik, txotxongiloen tailerra egingo da. Bigarrenean, Garik “Txikiak eraikitzen” ikuskizuna aurkeztuko du, musikaren mundua haurrei hurbiltzeko.
Jarduera osagarriak
Jarduera osagarriei dagokienez, bisitariak Elkartasun Gunera hurbildu daitezke. Ekimen hori zenbait GKEren lankidetzaz antolatu da. Erakunde horiek egindako lana erakusteaz gain, Espazio Solidarioan Bidezko Merkataritzak tartea izango du; Munduko Eskulangintza Azokan, bisitariek zenbait herrialdetako artisautza-objektuak erosi ahali zango dituzte. Munduko Terraza Getxoko Immigranteen Plataformarekin lankidetzan antolatu da, eta horretan hainbat herrialdetako jakiak dastatu daitezke.
Sarrerak
Ohi denez, saio nagusiak ordaintzekoak izango dira eta gainerakoak, doakoak. Sarrerak eta kontzertu guztietarako abonamenduak salgai daude Kutxabanken orotarako kutxazainetan, www.kutxabank webgunean, Algortako Kultur Etxean (Villamonte, A-8) eta 944 914 080 telefono zenbakiaren bitartez.
Datorren astean munduko musikez gozatu ahal izango dute zaleek Areetan eta Itzubaltzeta / Romon, Folk Getxo BBKren eskutik. Irailaren 5etik 8ra, 29. Nazioarteko Folk Jaialdiak 12 saio hartuko ditu. Clannad banda irlandarra, Kepa Junkera trikitilaria, Budiño gaita-jotzaile galiziarra, Yacine & The Oriental Groove fusio mediterraneoko taldea eta "Kukai & Lagunak" musika eta dantza ikuskizuna izango dira aurtengo protagonista. Areetako Xake plazan kontzertu nagusiak izango dira 21:00etan (igandean, 20:00etan) eta arratsaldeko saioak, plazaren ondoko aparkalekuan, 19:00etan (igandean, 18:00etan). Bertan ere Munduko Terrazako kontzertuak (23:00etan) zein haurrentzako goizeko saioak (12:30ean) izango dira. Horiez gain, jarduera anitz egongo dira Folk Getxon, esaterako zenbait gobernuz kanpoko erakunderen eta elkarteren postuak bilduko dituen Gune Solidarioa, Munduko Eskulanen Azoka, hainbat herritako platerak eskaintzen dituen Munduko Terraza eta kale banden desfileak. Argazkian, Budiño gaita-jotzailearekin batera joko du Kepa Junkerak / cc-by Candy Schwartz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun