Bai Ertzaintzak, bai Erandioko udaltzainek agente-kopurua handituko dute San Agustin jaietan, Eusko Jaurlaritzaren Segurtasun Sailak iragarri duenez. Batzuek zein besteek polizia-patruilak areagotuko dituzte, uniformez eta kaleko arropaz jantzita, bai jai-esparruan, bai horren inguruan, baita Erandioko metro-geltokian ere, liskarrak eta erasoak saihestearren. Bereziki zainduko dituzte alkohola saltzen duten lokalak, haietan adingabeei edari alkoholdunik sal ez diezaieten. Antolamendu horren barruan alkoholemiako prebentzio-kontrolak ere egingo dituzte alkoholaren eraginpean dauden pertsonak bidean zirkulatzea saihesteko. Garrantzi berezia izango dute jaietan zirkulazioaren eta gai estupefazienteen kontsumoaren arloko prebentzioak eta zehapenak, lehen aipatutako iturriek gaineratu dutenez. Atzo hasi ziren San Agustin jaiak Erandion eta igandera arte luzatuko dira. Argazkian, Kantagunea Altzagan barrena.
Udaltzaingoak eta Ertzaintzak jai-ekitaldietan parte hartzen dutenei diru-zorroak eta ondasunak ongi zaintzeko eskatu nahi diete, lapurretan aritzen diren gaizkileak -zorro-lapurrak, alegia- ugarituko baitira jaietara eta aurreikusitako kontzertuetara hurbilduko den jende andanak erakarrita. Halaber, alkatetzaren dekretuz xedatutako ordutegiak betetzeko orduan ere "zorrotz" jokatuko da, "jaien gozamena eta gainerako pertsonen atsedenerako eskubidea bateragarri egiteko".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun