Euri-zirin moduan hedatzen ari da politika ofiziala ez dela fede-kontua; partitokraziak gabeziak dituela eta egitura bertikala eraginkorra ez den heinean, ekimen horizontalek eman beharko dituztela soluzioak.
Euri-lanbroa balitz bezala barneratzen ari gara gutariko bakoitzak guretik bultzatu beharko dugula, formula berriak asmatu, irtenbide nobedosoak proposatu eta, orain 30 urte egin genuen bezala, auzolana aldarrikatu. Eta auzolanean ez dago bertikaltasunik. Hori bai, den-denek egin behar dute beharra, inor eskakeatu gabe.
Laura Mintegi idazle, irakasle, kazetari eta legebiltzarkide algortarrak pasa den astelehenean bere blogean argitaratutako artikulua.
[© Laura Mintegi] Igande arratsaldean zirimiri fina hasieran eta ondoren euri-jasa ederra jausi zen Bilbon Aste Nagusiari amaiera emateko. Zerikusirik ez du, ordea, orain 30 urte jausi zen ur-emari itzelarekin. Bidenabar aipatuko dut inoiz ez dudala ahanztuko egun haietako usaina: 10 minuturo atera behar izaten ginen Bidebarrietako Liburutegiaren sototik, maskara jantzita ere, lokaztutako hemeroteka paladaka husten ari ginen bitartean. Gaur, baina, beste zirimiri batez mintzatuko naiz, azken hilabeteetan jendartea bustitzen ari den euri-langar isilaz. Nire begitanzioa izan daiteke, baina iruditzen zait apurka-apurka, ia ohargabe, autoritate kontzeptua aldatzen ari dela eta, dagoeneko, ez diogula aitortzen autoritaterik ez-arrazoizko aginduak ematen dituenari, bere kargua edozein dela ere. Autoritatea, honezkero, ez da karguak ematen duen ahalmena, baizik eta pertsona batzuek duten kualitatea, balio intrinsekoa. Politika ofiziala desakralizatzen ari da, eta eraikinetatik espaloietara jaisten ari da, egunez egun. Argazkian, Laura Mintegi Lakarra / cc-by-sa Euskal Herria Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun