"Herriko tabernen" auziko epaiketa salatzeko lan-taldea osatuko dute Algortan
Urriaren 17an abiatuko du 35/02 auziaren epaiketa Espainiako Auzitegi Nazionalak. Goizeko 10etan, hasiko dira epaitzen ezker abertzaleko 40 kide, herriko tabernen bitartez ETA finantzatzea leporatuta. 372 urteko kartzela zigorra eskatzen du Fiskaltzak guztira; zortzi eta hamabi urte arteko zigorrak bakoitzarentzat. Akusatuen artean dira Jose Luis Franco eta Maite Amezaga algortarrak eta Izaskun Barbarias urduliztarra. Hainbat urtez Getxoko Udalean lan egin eta PPk bertatik kaleratu nahi izan zuen Sabin del Bado sondikarra ere auziperatuta dago sumario honetan. Aipatu lau lagunei zortzi urteko espetxe zigorra jarri nahi diete. Zehazki, Algortan, batzar irekia egingo dute asteazken honetan, irailak 4, horren inguruko lan-talde bat sortzeko asmoz. Hitzordua 19:00etan jarri dute Abian Kultur Elkartean, Bidebarri kalean. "Garrantzitsu eta interesgarria da parte hartzea. Gonbita luzatzen zaizu bertaratzeko, edota inor ezagutu dezakezu zure inguruan. Modu asko daude laguntzeko, parte-hartzeko...", sustatzaileek zabaldu dutenez. Argazkian, Ertzaintzak 2006ko urriaren 25ean egin zuen miaketa Leioako Kurkudi herriko tabernan.
2002ko apirilean hasi zuen Batasuneko kideen aurkako auzia Baltasar Garzon epaileak. 11 pertsona atxilotu eta 75 herriko taberna bahitu zituen, badaezpadako neurri gisa. Administratzaile judizialak ere ezarri zituen, tabernen diru kontuei jarraipena egiteko. Garai haietan europarlamentarioa zela azaldu zuen Karmelo Landa Leioa eta Erandioko campuseko irakasleak. Beraz, immunitatea zuela. Akusazioa agintaritza hartatik harago doala esanez bota zuen atzera Landaren helegitea auzitegiak. Auzitegiak ezarritako egitarauaren arabera, otsailaren 17ra arte luzatuko dira deklarazioak. Auziperatutako lagunez gain, ehun herriko taberna baino gehiagoren arduradun zibilak igaroko dira aretotik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun