Leioa eta Sopela ere ez dira merkeak
Alokairuan ez ezik eros-salmentan ere preziorik garestienetakoak topa daitezke Uribe Kostan. Izan ere, Getxo, Sopela eta Leioa dira, hurrenez hurren, Estatu espainoleko hirugarren, laugarren eta bosgarren udalerriak. Soilik Donostian eta Sitges-en da garestiagoa etxebizitza erostea. Getxon, 3.728 euro kostatzen du metro koadro bakoitzak, besteak beste. Sopelan, ordea, 3.450 euro eta Leioan, berriz, ehun euro gutxiago. Donostia da egun metro koadroa 4.000 eurotik gora dagoen hiri bakarra. Bertan, 4.406 euro balio du metro bakoitzak.
Getxo da, Donostiaren ostean, Estatu espainoleko alokairurik garestienak dituen udalerria. Horrela jakinarazi du Fotocasa higiezin atariak uztaileko datuei buruz asteartean argitaratutako txostenean. Etxebizitza bat alokairuan hartzeko batez besteko prezioa metro koadroko 11,05 eurotan dago Gipuzkoako hiriburuan eta 10,85ean Uribe Kostako udalerrian. Rankineko hirugarren hiria Bartzelona da, 10,75 eurotan. Podiumetik kanpo baina Estatuko laugarren tokirik garestienean Bilbo dago, metro koadroko 10,45 euro ordaindu behar direla batez beste. Gauzak horrela, EAE da erkidegorik garestiena eta metro karratuak 9,75 euro balio du. Halaber, hiri garestienen artean daude Madril (10,39 euro metro karratuko) hiriburua eta Pozuelo de Alarcon (9,80 euro), Kataluniako Sant Cugat del Valles (10,24 euro) eta Castelldefels (9,81 euro), eta Eivissa (10,27 euro). Bestalde, tokirik merkeenen zerrendan daude Baeza (Jaen), Fuensalida (Toledo), Alzira (Valentzia), Las Gabias (Granada) eta Vila-Real (Valentzia). Estatu espainoleko batez besteko prezioa 7,10 euro da metro koadroko eta hileko. 2007ko maiatzaz geroztik % 29,8 jaitsi da alokairuaren prezioa. Argazkian, etxebizitzen prezioak salatzeko Algortako Gazte Asanbladak 2008an egindako ekimen bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun