Ertzaintzak 22 eta 26 urteko gazte bana atxilotu zuen atzo eta herenegun, Erandioko Lutxana auzoan labanaz mehatxu eginez sakelako telefono bat lapurtu zutelakoan. Eusko Jaurlaritzaren Segurtasun Sailak zabaldutakoaren arabera, lapurreta ostiral goizaldean jazo zen. Ertzaintzak jasotako salaketaren arabera, gertakaria aurreko ostiral goizaldean izan zen, lauak pasatxo zirela. Ordu-inguru horretan, biktima, etxera zihoala, ohartu zen bi pertsona atzetik jarraika zituela. Gaztearen parera iritsi zirenean, hizketan hasi eta gerturatu egin zitzaizkion. Lutxanako metro geltokiaren parean, biktima lurrera bota zuten. Erasotzaileetako batek labana bat atera eta gaztea ikaratu zuen; bien bitartean, bigarrena arropetan begira ibili zen, baliozko gauza guztiak emateko eskatuz. Azkenean, telefono mugikorra kendu zioten patrikatik, eta ihesi abiatu ziren.
Biktimari arreta ematera joandako ertzainek jakin zuten bi ustezko egileek beste liskar batean ere parte hartu zutela Erandioko jaietan, eta bertan Udaltzaingoak identifikatu egin zituela. Informazioa trukatu izanari esker, biak identifikatu eta atxilotu egin ei zituzten. Susmagarrietako bat astelehenean atxilotu zuten, eta atzo, asteartea, bigarren laguna ere bai. Bi gizonezkoek, 22 eta 26 urtekoak, delitu-aurrekariak dituzte, eta lapurreta bat larderiaz egin izana egotzi diete delitu gisa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun