Plentziako jaiak
Aurreko asteburuan eskainitako gaueko zerbitzu berezian, 9.000 lagun baino gehiago joan ziren metroz Plentziako jaietara, eta larunbata izan zen egun nagusia, 7.015 bidaiarekin. Kopuru honek bost aldiz gainditu du geltoki horretako ohiko zirkulazioa. Izan ere, mila erabiltzaile inguru egoten dira abuztuko asteburu batean. Aipatu egunetan 56.357 lagun hartu zuten metroko gau zerbitzua geltoki guztietan. Horietatik 37.131 larunbatean eta 19.226, ostiralean.
Getxo Folk Jaialdia
Hiri metropolia ustiatzen duen konpainiak kolorea jarriko du bihar ostegunean, irailak 5, Eskoziako “Reading Pipe Band” gaiteroen taldearen emanaldia dela medio Areetan egingo den Getxo Folk Jaialdian. Musika taldeak, Bizkaiko Foru Aldundiak Bilbon duen egoitzan egingo den harreraren ostean, kaleko emanaldia egingo du Bilboko Kale Nagusitik, eta metro barruan jarraituko du, Zazpi Kaleetako geltokitik (bertara 12:45era heltzea aurreikusi dute) Algortako Bidezabal geltokiraino.
Astelehenean, irailaren 9an, neguko ordutegietara bueltatuko da Metro Bilbao. Ohiko maiztasunak hasiko dira berriz, "eta lanera eta ikastera itzultzeagatik sortutako garraioaren eskaerari behar bezala erantzungo" dio, garraio enpresako iturriek adierazi dutenez. Goizeko puntako orduan izango den zerbitzua nabarmendu nahi izan dute. Ordutegi horretan bidaiari gehiago espero dute, eta maiztasuna 2,5 minutukoa izango da ardatz nagusian (Bilbo eta Etxebarri). Santurtzi eta Bidezabaleraino 5 minuturik behin egongo dira trenak, eta Plentziara, ordea, 20 minuturik behin. Ordutegiak eta maiztasunak ikusteko, Metro Bilbaoren webgunera jo daiteke. Halere, astelehenean neguko ordutegietara bueltatu arren, iraileko ostiraletan gau osoan ibiltzen jarraituko du metroak. Bitartean, metroak milaka bidaiari hartu zituen pasa den asteburuan Plentzian, herriko jaiak direla eta. Era berean, Getxoko Folk jaialdia dela eta, biharko ekimen berezia prestatu du garraio enpresak. Argazkian, bidaiariak metro geltoki batean, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun