Ikuskizunaren sinopsiak
Verdasca. 2006. urtean jaio zen talde hau, Llanerako Udal Musika Eskola eta “La Raitana” Gaitero Banda elkartu ostean. Asturiaseko musika tradizionala berregiten du talde honek, euren abesti propioak ere sortzen dituzten arren. Horretarako, formatu akustikoan Asturiaseko musika-tresna tradizionalak eta gitarra akustikoak eta perkusio latinoak elkartzen dituzte.
Kukai Dantza Taldea: “OteHitzari biraka”. Jorge Oteiza 1908. urtean jaio zen Orion eta 2003. urtean hil zen Alzuzan. Urte horiek denak indar osoz bizi izan zituen. 1957. urtean eskultore batek jaso dezakeen izendapenik gorenena eskuratu zuen Sao Paoloko Bienalean, eta berak orduantxe erabaki zuen eskultura uztea. Euskal Herrira itzuli eta gizartearen eraldaketa estetikoa aldarrikatu zuen. Hain zuzen, hori da ikuskizun honek azaltzen duen Jorge Oteiza. Oteiza beraren hitzak, olerkia, musika eta dantza izango dira kontakizunaren lengoaiak. Mikel Urdangarin, Bingen Mendizabal eta Rafa Ruedaren musikak atmosfera berezi batean kokatuko ikuskizuna.
The Sey Sisters. Ghanako hirukote honek gospela, soula eta musika afrikarra lantzen dute euren ahots zirraragarrien bidez. Kantuak emozioz beterik daude, askotan injustiziak sortutakoak direlako, eta giza eskubide eta etorkizunaren esperantzaren aldeko aldarria egiten dute. The Sey Sisters hiru ahizpa dira: Edna Sey, Kathy Sey eta Yoly Sey, eta pianoagaz Albert Bartomolome. 2006. urtean hasi ziren munduari buelta ematen, eta gospel talderik garrantzitsuenetakoak dira.
Bigarren urtez, “Sopela Munduan, Mundua Sopelan” jaialdia ospatuko da udaletxe plazan, irailaren 13tik 15era. Horren helburua munduko txoko ezberdinetako herriak gurean ezagutzera ematea da, gure herria ere atzerrian ezagutzera ematen dugun bitartean, udal sopeloztarretik adierazi dutenez. Horrela, munduko kultura ezberdinen arte eszenikoak (kantua, musika, dantza, antzerkia, eta abar) ezagutzeko aukera egongo da, Euskal Herrikoa ere ezagutaraziz. Emanaldi guztiak debalde izango dira. Ostiralean Asturias izango da protagonista nagusia: Banda de Gaites Ribeseya taldeko gaiteroak kalez kale izango ditugu bazterrak alaitzen 20:30etik aurrera, eta 22:00etan kontzertua eskainiko dute Verdasca taldeko lagunek. Larunbatean, aldiz, Kukai dantza taldeko “OteHitzari biraka” izen handiko ikuskizuna ikusi ahal izango da, Euskal Herriko talderik arrakastatsuenetakoa, 22:00etatik aurrera. Igandean, berriz, Ghana izango da gonbidatua, The Sey Sisters Ghanako taldearen bidez, 21:00etatik aurrera. Argazkian, Kukai Dantza Taldea izango da Euskal Herriko ordezkaria / cc-by Quincena Musical.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun