Horrekin guztiarekin batera, egun horietan ere, “aparka esperientzia” delako jardueran parte hartu ahal izango da, Areetako Xake plazan, goiz eta arratsaldez. Bizikletak maileguan emateko eta era seguruan aparkatzeko sistema aitzindaria ezagutu ahal izango da. “aparka” sistema Emaús Bilbaok garatu du, hain zuzen ere, Mugikortasun Jasangarriaren Zentroaren bitartez.
Saltokiak
Aipatzekoa da ere, astean zehar herriko saltokiek bat egingo dutela harekin, erosketak egiteko bizikletaz mugitzen direnak babesteko. Bizikletaz, talde alai batek Algorta eta Romo-Areetako denda-kaleak girotuko dituzte hilaren 20 eta 21ean, ostiral eta larunbatean, bizikletaz dabiltzan edo erosketak egiten dituztenei GetxoBizi bizikleta zerbitzua erabiltzeko txartelak oparituz.
Keltse Eiguren Ingurumen zinegotziak gogoratu duenez, “ibilgailuen CO2 emisioak dira hirietako aireko kutsaduraren eragile nagusienetakoak eta bertako biztanleen osasunarentzat arrisku-faktorea da, ingurumenarentzat kaltegarria izatearekin batera. Gure garraio ohiturak aldatzea egin beharreko bide luzea izan daiteke. Bide horren jomuga, hiriko airearen kutsadura etetea da. Mugikortasun Astea, hiritar guztiek zeregina duguna oroitzea nahi du, eta aldaketa txikienek ere, hala nola, bizikletan ibiltzeak, garraio publikoa aukeratzeak edo ibiltzea hautatzeak, gure bizi-kalitatea hobetu dezaketela”.
“Mugitu aire garbiagoaren alde!” lelopean egingo dute Getxoko Mugikortasun Astea
Europako Mugikortasun Astea irailaren 16tik 22ra ospatuko da Getxo udalerrian, “Mugitu aire garbiagoaren alde!” lelopean, garraioak hiriko airearen kalitatean duen eraginari buruzko hausnarketa egitera gonbidatzeko, udal iturriek zehaztu dutenez. Horretarako hainbat jarduera antolatu dituzte, besteak beste, zinema, paseoak herritik, hegaztiei eraztuna ipintzea, “aparka” sistema ezagutzera ematea, bizikletaren aldeko apustua indartzea… Ohi bezala, igandean, hilak 22, 08:00etatik 20:00etara, Algortako eta Areetako erdiguneak zirkulaziorako itxita egongo dira eta hainbat jarduera ludiko egingo dira (puzgarriak, jolasak, zalditxoak, segways, tailerrak…). Astea dela eta, Udalak GetxoBizi bizikleta maileguaren zerbitzuari lotutako sakelako telefonoentzako doako aplikazioa aurkeztuko die hiritarrei. Era berean, CEDEMOS Mugikortasun Jasangarriaren eta Giza Berrikuntzaren Zentroko arduradunek, Mugikortasun Astearen esparrua baliatuta, zentroan garatutako I+G+b-ko azken proiektuak erakutsiko dizkiete sektoreko adituei. Ekimena hilaren 16, 17 eta 18an izango da. Argazkian, Getxoko Errotatxu industrialdeko CEDEMOS zentroan aurkeztu zuten 2012ko abenduan bizikletak mailegatzeko zein norberarena uzteko "aparka" sistema / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun