“Kontsumoak beherakada orokorra izan badu ere, Euskadin kontsumo ekologikoak gora egin du. Eta horren adibidea da Getxoko udalerria, bertako biztanleak elikaduraz gero eta arduratuago izanik gai ekologikoak ekoizten dituzten nekazariekin harremanetan jartzen baitira asteko erosketaren otzara betetzeko. Kontsumitzaile horiek produktu ekologiko eta bertokoen aldeko apustua egiten dute. Merkaturatze-kanal laburrak sustatuta, elikadura osasungarria egiteaz gainera –hondakin, transgeniko eta pestizida gabekoa-, onura soziala ere lortzen da aldi berean, landa eta bertako ekonomia bizkortzen lagunduz. Bio Getxoren zortzigarren aldia aukera ona da kontsumitzaile eta ekoizleren arteko aliantza horiek indartzen jarraitzeko”, aipatu dute Ekolur elkartetik.
Halaber, EAEn energia berriztagarrien eta garapen jasangarriaren arloan lan egiten duten enpresak ezagutzera emateko asmoz, azokan bioeraikuntzari lotutako proiektuak gauzatzeko, eta energia berriztagarriekin lantzeko dauden materialak ere erakutsiko dituzte, besteak beste.
Nekazaritza Ekologiko eta Energia Berriztagarrien VIII. Azoka, Bio Getxo 2013, egingo dute larunbat honetan, irailak 14, Algortako Telletxe plazan. Azoka Ekolur Bizkaiko Nekazaritza Ekologikoaren elkarteak antolatu du, Udalak eta BBK-k babestuta, besteak beste. Ekimena udal gobernu taldea garapen jasangarriaren alde aurrera eramaten ari den politiken artean kokatzen da, “kasu honetan, zehazki, kontsumo ekologikoa hurbildu nahi diegu herritarrei, arduratsua, osasungarria eta ingurumenarekiko adeitasunezkoa baita”, azaldu du Keltse Eiguren Ingurumen zinegotziak. Azoka 10:00etatik 15:00etara egongo da zabalik eta hamabost erakustoki inguru bilduko ditu. Bertan izango diren ekoizle eta egileak, gehienak, Bizkaikoak izango dira, baina Gipuzkoa, Ipar Euskal Herria, Nafarroa eta Arabatik etorritakoak ere izango dira. Etxoletan produktu ekologikoak (ongarriak edo produktu kimikoak ezta gai transgenikoak ere erabiltzen ez dituztenak), ugari, erakutsi eta salduko dituzte: frutak, barazkiak, ardi-, ahuntz- eta behi-gaztak, marmeladak, ogia eta pastelak, ardoa, kontserbak, eztia, olioa, eta abar. Talo eta txorizo ekologikoa ere dastatu ahal izango dira, ardoarekin eta sagardoarekin batera, horiek ere ekologikoak eta bertakoak. Argazkian, azoka bat Algortan / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun