Pirritx, Porrotx eta Marimotots Euskal Herriko pailazo euskaldun ezagun eta maitagarriak Larrabasterran izango dira gaur, osteguna. Pailazoek "Sentitu, pentsatu, ekin!" ikuskizun berria ekarriko dute Urko kiroldegira. Ohi bezala, ordu eta laurdeneko bi saio emango dituzte, arratsaldeko 4:00etan eta 6:30ean, tokiak mugatuak izango direla. Gauzak horrela, interesatuta den neska-mutil orok bere pailazorik gustukoenak ikusi ahal izan ditzan guraso despistatuenek ipurdia mugitu beharko dute, sarrerak eskuratzeko aukera 14:00etan amaituko baita. Txartelak 5 eurotan eskura daitezke udaletxean, Larrabasterrako Sopelarin bulegoan, Kurtzio kultur etxean edo Internetez, Sopelana.net webgunean. Argazkian, Porrotx eta Marimotots Areetan eginiko emanaldi baten ostean Bizarra Lepoan eta Egizuko kideekin / cc-by Egizu.
"Sentitu, pentsatu, ekin!"
Hogeita bost urte igaro dira jada pailazo taldeko kideak sudur gorriak eta zapata handiak jantzi eta herriz herri irria zabaltzen hasi zirenetik. Asko dira urteak, eta gehiago Euskal Herriko lagunekin batera bizi izan dituzten abenturak, elkarrekin partekatutako irriak, malkoak, muxuak eta besarkadak. Ospakizun urtea dute, hortaz, agertokiz kanpo ez ezik, baita oholtza gainean ere. Izan ere, pailazoen amona Josefinak 100 urte beteko baititu! Pirritxen, Porrotxen, Mari Mototsen eta Pupu eta Loreren eskuetako hatzak zein oinetako behatzak ere behar dira halako zenbaki potoloa zenbatu eta osatzeko! Pailazoak eta lagunak amonaren baserrira joango dira beraien amona eta jada birramona ere badenarekin festa egitera. Zaharra bezain polita, argia eta irudimentsua da amona. Anakleto ijitoak, Kintxo Barriletek, Tantaka Yotanka Ameriketako indioak, Poxpolin Marisorginek, Gorriti aztiak… guztiek zoriondu nahi dute Josefina maitagarria. Bada norbait, ordea, festa zapuztu nahi duena, eta pailazoak eta koadrila oztopatzen saiatuko dena etengabe. Lortuko ote du? Ala maitasuna eta alaitasuna gailenduko ote dira azkenik? Zatoz pailazoekin batera amona Josefinari "Zorionak zuri" abestera!
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
