Erronka potoloa izango da: Ugeraga, Ander Deuna Ikastola eta Zipiriñe eskolaren entrenamenduak euskaraz burutzea, entrenamenduen kalitatea ere bultzatzen den bitartean. Futbol taldeen kategoriak honakoak izango dira: benjaminak, kimuak eta umeak. Lertxundik saio teoriko eta praktikoak eskainiko dizkie entrenatzaile eta futbolariei: lehenik eta behin saio praktiko eta teorikoak egingo dira entrenatzaileekin (16 entrenatzaile guztira, 11 talde ezberdinetakoak guztiak). 25 orduko saioak izango dira, eta irailean zehar burutuko dira. Bertan, kirol arloko terminologia zehatza ikasi ahal izango dute, entrenamenduak aurrera eramateko erreminta ezberdinak e.a.
Proiektu honen bidez, entrenatzaileek euren entrenamenduen kalitatea hobetzeko aukera izango dira, eta kirolariek kirol arloko euskarazko berbak ikasiko dituzte.
Kiroldegian ere, euskaraz
Martxoan, Aitxu! Euskara Taldeak “Sopelako kiroldegian ere euskaraz” kanpaina abiatu zuen, Udalaren eta Serviocio enpresaren lankidetzarekin. Apirilean kiroldegiko erabiltzaileen artean inkesta banatu zen, jarduerak euskaraz jasotzeko aukeraz galdetzen, eta emaitza oso argigarria izan zen: inkesta bete zuen %80 euskaraz eskolak jasotzeko nahia agertu zuen.
Inkestaren emaitzak kontuan hartuz, Serviocio enpresak honako erabakiak hartu zituen: langileek erraztasunak izango dituzte euren euskalduntzerako, adingabeen ikastaro guztiak euskaraz eskainiko dira, eta areto-jardueren %50 euskaraz eskainiko da (ikasturte amaieran %70era heldu daiteke). Sopelako Udalak kanpaina honetan parte hartu eta lagundu duten eragile guztiak eskertu nahi ditu, oso modu berezian Aitxu Euskara Taldeak eta Serviociok egin duten esfortzua eta lana.
“Kirolean ere euskaraz” kanpainaren nondik norakoak eta azken urratsak argitu ditu gaur Sopelako Udalak. Betitxe Saitua zinegotziak azpimarratu duen legez, tokiko erakundeak "euskararen erabilera normalizatzeko apustu sendoa egin du, eta kirol esparruan orain arte errealitate izan diren ahulguneak gainditzeko asmoz, 'Kirolean euskaraz' leloarekin bat egingo duten hainbat ekimen sustatuko ditu”. Alde batetik, udalerriko futbol taldeetako entrenamenduetan euskararen erabilera bultzatzea izango da helburuetako bat. Horretarako, Sopelako Udalak eta Koikili Lertxundi futbolaria eta Itzarri Consulting taldeko kideak elkarrekin proiektua abiaraziko dute. Aipatu enpresa hiru urte daramatza euskararen erabilera kirolean bultzatzen. Beste alde batetik, euskararen erabilera kiroldegian ere bultzatuko da: lehen aldiz, udal kiroldegiak hainbat areto-jarduera euskaraz eskainiko ditu (orain arte umeentzako jarduera batzuk baino ez ditu euskaraz eskaini). Argazkian, prentsaurrekoan, honakoek parte hartu dute: Koikili Lertxundi (Itzarri Consulting), Unai Espina (Serviocio, udal kiroldegia kudeatzen duen enpresa), Mikel Begoña (Aitxu! Euskara Taldea) eta Betitxe Saitua (Sopelako Udaleko Euskara Zinegotzia).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun