Urteak konponbidea eskatuz
Gaminiz Bizirik elkarteak ohar batean adierazi duenez, Gorlizko eta Plentziako udal gobernuak dira ezbeharraren erantzule, aurrez tankerako istripuak saihesteko galdegindako segurtasun neurriak hartu ez dituztelako.
Mungia Bidearen egoera arriskutsua da oso, haien hitzetan. Ez dago espaloirik eta bazterbiderik eta zebra bideak txarto marraztuta eta arriskutsu daude. Ezbeharra gertatu zen zebra bidea, adibidez, aldapadun autoen irteera batean bukatzen da.
Gaminiz Bizirik elkarteak gogorarazi duenez, bi urte baino gehiago daramatza Gaminiz auzoa arriskutsua dela salatuz. Denbora tarte horretan, behin-behineko segurtasun neurriak hartzeko galdegin diete Plentziako eta Gorlizko udalei, Mungia Bideko espaloi berriak egiten dituzten artean. Plentziara sartzeko autoek eta autobusek duten bidea da honakoa.
Eskaera hauen aurrean, "jaramonik egin" ez dutela salatu dute elkarteko kideek eta, gertaera lazgarri honen aurrean, jarrera aldatu eta bizilagunen segurtasuna handitzeko neurriak hartzeko galdegin diete.
Andra bat hil ostean Mungia Bidean segurtasuna handitzeko protestak indartuko dituzte
Gaminiz Bizirik elkarteak Plentzia eta Gorliz udalerrien artean dagoen Mungia Bidean oinezkoek duten arriskua salatzeko protesta bat deitu du gaurko, Gorlizko udaletxearen aurrean. Ekimena arratsaldeko 7etan egingo dute, bertako udal bilkura hasi aurretik. Halere, lehenago, 18:30ean, Mungia Bideko autobus geralekuan jarri dute beste hitzordu bat, auzokideak udaletxeraino batera igotzeko. Elkarteak erabaki hori hartu zuen Vicenta Rodriguez 74 urteko andraren heriotza zabaldu ondoren. Izan ere, Rodriguez Mungia Bideko zebra bide batean harrapatu zuen auto batek, hilaren 5ean. Une hartan gogotik ari zen euria, eta zebra bidea ikusgarri ez dagoenez gidariak "ez zuen andra ikusi", ertzainen arabera. Gauzak horrela, emakumea larri eraman zuten Gurutzetako ospitalera, buruan kolpe handia zuela. Pasa den larunbatean, istripua izan eta hamar egunera hil zen. Atzo, Plentziako Santa Maria Magdalena elizan eman zioten azken agurra. Harrapaketa tragikoak bizilagunen haserrea eragin du, "espero zitekeen gertaera" zelako, haien esanetan. Istripua jazo zen egunean, gune arriskutsu horretan elkarretaratzea egin zuen Gaminiz Bizirik bizilagun elkarteak. Handik sei egunetara, hilak 11, berriro ere zebra bidean mobilizazioa egin zuten 200 bat auzokidek. Hurrengo egunean, ordea, Plentzia eta Gorlizko udal gobernuekin batu ziren. Gorlizko EAJk jakinarazi zuenez, 268.000 euro bideratuko dituzte Gaminizen espaloia jartzeko. Halere, administrazio prozedurak eskatzen dituen urratsak betetzeak hainbat hilabete atzeratuko ditu lanak. Argazkian, pasa den ekainean harrapaketak salatzeko txorimaloak jarri zituen auzo elkarteak / © Gaminiz Bizirik.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun