Urubi, apo-hontz eta hontzen kasuan, txitak hegan egiten ikasi aurretik irteten dira habiatik, eta haren inguruan ibili ohi dira, hegaldatuz eta adar batetik bestera jauzika, baina egunek aurrera joan ahala hobeto egiten dute hegan. Txita horietako asko habiatik erortzen direnez, ingurutik dabiltzan pertsonek jaso egiten dituzte eta Aldundiko Base Gorrira deitzen dute (944 465 297), eta handik, gero, Gorlizera eramaten dituzte. Askatu, berriz, jaso dituzten lekutik hurbil askatu ohi dira txita horiek: gautzen denean, amak deitu egiten die eta haien bila ibiltzen da.
Harrapari espezieak Bizkaian
Bizkaiko lurralde historikoan gaueko zazpi harrapari espeziek egiten dute habia: hontz zuria, urubi arrunta, mozolo arrunta, apo-hotz europarra, hontz handia, hontz ertaina eta landa-hontza. Sortzen duten onuretako bat da mikrougaztun kilo asko jaten dituztela; beraz, arratoien kontrako erremediorik onenetakoa dira. Hegazti txikienek –mozoloek eta apo-hontzek–, gainera, gure ortuentzat kaltegarriak diren intsektu handiak ere jaten dituzte, bareak eta sitsak, esaterako. Amaitzeko, aitortu behar dugu eskualde industrializatu askotan ez dagoen aberastasun biologikoa dagoela gurean hegaztioi esker. Dauzkaten mehatxuei dagokienez, nabarmendu behar da galduz doazela habia egiteko dituzten lekuak. Ehiztarien tiroek eragindako kalteak ere aipatzeko modukoak dira.
Gorlizko Fauna Basatia Sendatzeko Zentroak 75 basa animalia osatzeko lagundu ditu abuztuan eta iraileko hasieran. Gaueko harrapariak dira gehienak –14 urubi, 9 hontz, 5 apo-hontz eta 3 mozolo–, eta datozen egunetan askatuko dituzte, hegaztioi eraztuna ipini ostean. Hegaztiokin batera beste hauek ere itzuliko dira naturara: sorbeltzak, martin arrantzale bat, narrasti autoktonoak –7 apoarmatu korrontezale eta apoarmatu istilzale bat– eta 4 triku, kotxeek zapalduta edo beste animalia batzuek erasota jasandako zauriak osatuta. Urtean zehar zaintza behar duten ia mila animalia hartzen ditu Gorlizko zentroak: harrapatzerakoan jasandako erasoak edo dituzten gaixotasunak direla eta. Dena dela, deigarria da, oraingoan, artatutako hegazti gehienek ez zutela ez lesio traumatikorik ez gaixotasun zehatzik zentrora sartu zirenean. Izan ere, jendeak jasotako hegaztiak dira: hegan ezin zutela egin ikusita, jendeak batu egin ditu, bizirik irauten laguntzeko. Argazkian, Irene Pardo Nekazaritza diputatua / © Bizkaiko Foru Aldundia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun