Bestalde, ELAk azpimarratu duenez, "Amaia-Car eta Talleres Gazteluko bezeroek jakin behar dute orain egiten diren konponketak ez dituztela egiten lantegi horietako langileek, konponketa-lanak beste lantegi batzuetara desbideratzen dituztelako susmoa baitago".
Langileek, gainera, patronalen irizpideak ezartzea salatzen dute, ordezkari sindikalei enpresa-hitzarmena egiteko eragozpen gaindiezinak ezartzen baitiete; "hainbesteraino ezen ibilgailuak konpontzeko eta saltzeko 22 langileko enpresa hori ixteko zorian dagoen", ELAren aburuz. Aurreko urteetan ere, beste murriztapen neurri hartu dituzte enpresek, hala nola, kaleratzeak zein soldatak izoztea.
Datorren ostiralean, hilak 27, lau hilabete greban beteko dute Leioako Amaia-Car eta Talleres Gaztelu enpresetako langileek. Gatazkaren hasiera maiatzaren 27an izan zen, orduan enpresak bere kabuz langileen soldatak %15 eta %10 bitartean jaitsiko zitueneko asmoa jakinarazi baitzien. ELAk, lantaldearen ordezkaritzan, ezetza eman zion neurri hari, eta enpresa-hitzarmen bat proposatu zuen. Enpresek Peugeot ibilgailuak konpondu eta saltzen dituzte Leioako Ibaiondo auzoan, Areetatik gertu. Haietan diharduten langileek 120 egun bete dituzte greban dagoeneko. ELAk salatu duenez, soldata jaitsierak, Langileen Estatutuaren 41. artikuluaren arabera, "lan-baldintzak nabarmen" aldatzea eragingo luke. Berriz, Lan Batzordeak proposatutako enpresa-hitzarmenaren bidez lan-baldintzak arautuko ziren, eta hitzarmen-salbuespenetatik babesteko bermeak eta aurrera-eragina jasoko zituen. Hori dela eta, langileek soldata-murrizketa bertan behera utzi eta enpresa-hitzarmen bat egiteko eskatzen dute; lan-erreformaren aurkako blindajea duen hitzarmena, hain zuzen. Argazkian, langileek azken asteotan egindako mobilizazioren batean / © ELA.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun