"Egia bide, askatasuna amets" izeneko ekitaldia egingo dute larunbatean Zarautzen
Bilbon eginiko agerraldian, larunbat honetan, "Egia bide, askatasuna amets" lelopean Zarautzen egingo den ekitaldi politikorako deia egin zuten herenegun Egiari Zor fundazioak, Ahaztuak eta Goldatu elkarte memorialistek. Estepan Urkiaga "Lauaxeta" eta Candido Sasetaren sendiek ere bat egin dute deialdiarekin. Arratsaldeko 6etan abiatuko da ekitaldia, Aritzbatalde pilotalekuan. Bestalde, erregimen frankistak fusilatu eta 38 urtera, ETA erakunde armatuko kide izandako Juan Paredes Manot "Txiki" zarauztarra eta Anjel Otaegi Etxebarria azpeitiarra gogoratuko ditu irailaren 27ko (ostirala) Gudari Egunak. Jose Luis Sanchez Bravo, Ramon Garcia Sanz eta Humberto Baena FRAPeko kideekin batera erail zituzten. Argazkian, argazkian Gudari Eguneko ekitaldia Algortako Txiki eta Otaegi plazan, artxiboko irudian.
Ane Muguruza eta Idoia Muruagak hitza hartu zuten "Egia bide, askatasuna amets" lelopeko ekitaldiaren aurkezpenean, eta azaldu zutenez gatazka armatu eta politikoaren konponbidea bideratzeko "oso garrantzitsuak" diren hiru gako aztertuko ditu. Alde batetik, nabarmendu zuten "egia osoaren" alde lan egiten dutela, "gure kale eta historia liburuetatik ezer eta inor ezabatu gabe". Horrez gain, bakea, justizia eta elkarbizitza oinarri dituen eszenatoki berri bat lortzeko izan diren eragozpenak izango dituzte hizpide, Josu Muguruzaren alabak eta Igor Angulo espetxean hildako presoaren neskalagunak adierazi zutenez. Zentzu horretan, hamarkadetako gatazka aroa gainditzeko "aukera historikoa" dagoela esan dute, "askatasuna, egia eta memoria kolektiboa uztarturik". Izan ere, argi utzi zuten askatasunaren "erronka nagusia" dela pertsona guztien eskubide guztiak eta herritarren borondatea errespetatzeko hitza barne hartzen dituena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun