Obren ostean, eremua horrela geratuko da: Gobela eta Lemotza ibaien artean bertako espezieen baso bat sortuko da, ibai bien artean babestutako putzu bi sortuko dira eta hori guztia lotuz ibilbide basati bat sortuko da auzokideek bertatik pasatzeko aukera izan dezaten. Herri-lanak, beraz, Urko paduraren iparraldean egingo dira. Eremu honek uholdeak jasotzeko arriskua du, eta hori dela eta, kirol-azpiegitura gehiago eraikitzeko asmoak bertan behera utzi dira.
Urkoko biodibertsitatea handitzeko asmoz, honako ekintzak burutuko dira:
- Bertako espezieen baso bat birtsortzea: Gobela eta Lemotza ibaien alboan bertako espezieen zuhaitzak landatuko dira. Barruko aldean haritzak landatuko dira.
- Putzu bi sortu: erdiko gunean putzu bi sortuko dira, eta gune hezeak izango dira, biodibertsitatea handituz.
- Landare inbaditzaileak agertzea ekidingo da. Birsortzea da modurik onena horrelako espezieak agertzea eragozteko.
Ekimen hauek eremu honetako habitatak hobetzea ekarriko dute, eta honek lagunduko du mehatxupean dauden espezieak eremu horretan agertzea (anfibioak, hegaztiak, eta abar).
Landatzea, auzolan bidez
Beraz, aurrerantzean Larrabasterrako auzokideek beste inguru natural eta berde batez gozatzeko aukera izango dute. Gainera, sopeloztarrek proiektuan parte hartzeko aukera izango dute, auzolan bidez. Abendu hasieran landatze bat egingo da eta beharrezkoa izango da auzokideen laguntza. Hitzordua abenduan izango da.
Proiektu hau Sopelako Udalak bultzatu du eta La Suma Paisajistas taldeak egin du. Bere kostua 191.021 euro + BEZa izango da, eta Eusko Jaurlaritzak zein Bizkaiko Foru Aldundiak %80 ordainduko dute, Udalak diru-laguntza eskatu zuelako.
Atzo, asteartea, hasi ziren Urko padura berreskuratzeko lanak. Zehazki, padura horretan dagoen partzela bat Ingurumen arlotik berreskuratuko du Sopelako Udalak: "egun egoera kaskarrean dago (txintxorrez betetako zelaia da) eta asmoa Larrabasterrako gune berde batean bihurtzea da", tokiko iturriek azaldu dutenez. Partzela horretan putzu handi bi jarri, bertako espezieak landatu eta auzokideentzako ibilbide bat sortuko da. Herri-lanek hiru hilabeteko iraupena izango dute, eta bere helburu nagusiak honakoak izango dira: batetik, Urkoko berezko ekosistemak birsortzea, paduraren eta bere inguruan biodibertsitatea handituz. Eta bestetik, Larrabasterran eremu berde berri bat sortzea, auzokideek berau gozatzeko aukera izan dezaten. Laburbilduz, inguru horretako landaredia berreskuratuko da, habitat berriak ezartzea bultzatuko da, eta ingurumen-berreskuratzea erabilera publikoarekin uztartuko da. Proiektua berritzailea da (ekologia aplikatuaren adibidea), naturak berez emango lituzkeen urratsak antzeratuko direlako. Argazkian, herri-lanak Urko paduran / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun