Sopelako Udal Gobernu Taldearen oharra, hitzez hitz
Bart gauean herrian gertatutako erasoen aurrean, Sopelako Udal Gobernuak honakoa adierazi gura du:
· Ez dugu inondik inora bat egiten bart gauean gure herrian bi telefono antenen kontra izandako eraso horrekin.
· Gainditu beharreko dinamikak dira honako hauek, Euskal Herrian zabaldu den aro berri honetan lekurik ez dutenak.
· Ez dira gatazka gainditzeko, bakea eta normalizazioa lortzeko zabaltzen ari diren bideak indartzeko ahaleginetan onartu behar diren portaerak eta dinamikak.
· Bizi garen denbora berri honetan, gizarteari dagokio protagonismo osoa eta hitza, herri honek bizi izan duen gatazka gainditzeko.
Bart gauean Sopelako Olabide auzoan telefonia errepikagailu biren aurka egindako "erasoarekin" ez du "inondik inora bat egiten" bertako Udal Gobernuak. Bildu koalizio subiranistak osatzen duen tokiko gobernuaren ustez, Olabiden jasotakoak "gainditu beharreko dinamikak dira". Saioa Villanuevak gidatzen duen taldea haratago joan da prentsara bidalitako oharrean. haien ustez, "Euskal Herrian zabaldu den aro berri honetan lekurik ez" dute bart gertatutakoek eta horrelako "portaerak eta dinamikak" ez direla onartu behar azaldu dute, "gatazka gainditzeko, bakea eta normalizazioa lortzeko zabaltzen ari diren bideak indartzeko" nahi bada. Azkenik, horrelakorik egin beharrean, "gizarteari protagonismo osoa eta hitza" ematean sinesten duela azaldu du Sopelako Udal Gobernuak. Argazkian, Sopelako Udal Gobernu Taldea artxiboko irudian / © Sopela.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun