Oskar Sanchez itzubaltzetarra atxilotu du Guardia Zibilak

Oskar Sanchez Setien gazte itzubaltzetarra da Herrira mugimenduaren aurkako sarekadan atxilotutako 18 pertsonetako bat, Espainiako Gobernuaren Barne Ministerioak kaleratu duen informazioaren arabera. Sanchez abokatua da eta arlo juridikoan egin izan du lan Herrirarentzat. Gaztea itzubaltzetarra bada ere, Algortan bizitza sozial anitza egin du hainbat urtez. Sanchezi Herriraren Bizkaiko Buruzagitza osatu izana leporatzen diote, Roberto Noval Arostegi, Beñat Zarrabeitia Asensio, Ibon Meñika Orue-Etxebarria eta Jose Antonio Fernandez Hernandorekin batera. 18 atxilotuetatik 10 Hernanin atxilotu ditu Guardia Zibilak, bertan egin ei den "Nazio Zuzendaritzako barne bileraren baitan", Guardia Zibilaren arabera. Beste bost, Gipuzkoako beste gune batzuetan atxilotu dituzte eta bana Bizkaia, Nafarroa garaia eta Araban. Guztiak komunikazio egoeran daude, Naiz.info-k zabaldu duenez. Itzubaltzeta / Romon, manifestazioa egingo dute iluntzeko 8etan Kolas plazatik abiatuta, "Utzi bakean Euskal Herria. Oskar askatu!" lelopean. Erandion, berriz, Astrabuduako Josu Murueta plazan eta Altzagako metro geltokiaren ondoan elkarretaratz bana egingo dute, 20:00etan ere. Argazkian, Sanchez pasa den otsailaren 28an Itzubaltzeta / Romon 197/2006 Doktrinak bertako presoa den iñaki Gonzalo Casal "Kitxu"-rengan zer eragina izango duen azaltzeko eman zuen hitzaldian.