URA agentzia Gobelako metro geltokirako sarreran dagoen zubia ordezkatzen hasi da
URA Uraren Euskal Agentziak gaur hasi ditu Gobelako Metro Bilbaoko geltokira bidea ematen duen zubia ordezkatzeko lanak. Zubi berriak ur hustuketarako ahalmen handiagoa izango du, eta bat egingo du ibaiaren zabalera berriarekin, hau da, Errekaganen Gobela ibaiaren ibilguaren zabaltze lanak sortzen ari direnarekin, arduradunek adierazi dutenez. Zubia ordezkatzeko lanak egiteko, egungo zubian autoen trafikoa moztu da, eta behin-behineko saihesbide bat abian jarri da, Errekaganeko 17 eta 19 zenbakien arteko aurrealdetik doana. Saihesbide honi esker, Plentzia Hiriko auzokideek autoak aparkalekuetan gorde ahal izango dituzte. Oinezkoei dagokionez, sarbideak ibairen bi ertzetan jarri dira. Era honetara, murriztu nahi dira tamaina honetako obra batek bertako auzokideei sor diezazkiekeen eragozpenak. Argazkian, urtarrilean hasi zituzten Errekaganen Gobela ibaia bideratzeko lanak.
URA agentziak jakinarazi duenez, Gobela ibaian egokitzapen lanak abian dira Getxo ur-goraldietatik babesteko. Lanak eremuka antolatu dira. Cristobal Valdeseko gainezkabidetik eta La Avanzada arteko eremuko obrek 15.000.000 euroko aurrekontua dute, eta 18 hilabeteko iraupena aurreikusi zaie. Hortaz, 2014ko urrirako amaituak izatea aurreikusten da. Errekagane eremuan, Gobela ibaiako ibilguaren zabaltze lanak beharrezkoak dira, ur-goraldien sasoian segurtasuna hobetzeko. Izan ere, gaur egun ibaiak hustu dezakeena baino bost aldiz ur kantitate gehiago hustu ahal izango du. Ibai ibilguak zabalerako sei metro izatetik 11 metro izatera pasako da eta sakonera lau metrotan mantenduko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun