EAJren aburuz Euskadin bortxakeriarik gabeko gizartea finkatzeko ekimenean egin diren ahaleginak ezin dituzte bazterrera bota iraganeko estrategiekin amets egiten dutela ematen dutenek, ezta ETAk egin behar duena -desarmea eta barne egiturak desegitea- egin nahi ez duelako, ezta batzuek bakezko bizikidetzarako jarri dugun ordulariak salbuespenezko eta euskal gizartearen gehiengoak nahi duen agendatik kanpoko jardueren bidez atzera egitea nahi dutelako ere.
Etengabe hazten ari den atzeraldi egoera honen aurrean, Euzko Alderdi Jeltzaleak politikoki antolatuta dagoen Ezker Abertzaleari eskatu nahi dio bere kabuz ekin diezaiola bake prozesuan gaur egun dagoen blokeoa suntsitzeko urratsak emateari. Aldi berean, Espainiako Gobernuari eskatu nahi dio salbuespen juridikoa mantentzeko estrategia bazter dezala, jarrera arbitrario eta oinarri juridiko zalantzagarrikoa izateaz gain, amaitutzat jotzen genuen iraganera bideratzen gaituelako.
ETAk iragan astean plazaratu zuen komunikatua ez zen albiste ona izan Euskadirentzat. Gaurko atxiloketak ere ez dira. Arduraz jokatzeko garaia dugu, guztion artean balore goren dugun bakea finkatzeko garaia. Begira dezagun aurrera, amai daitezen behingoz, herri honek merezi duen bizikidetza eragozteko saiakerak.
Euzko Alderdi Jeltzalea (EAJ)
Euzko Alderdi Jeltzalearen Euzkadi Buru Batzarra, gaur arratsaldean Bilboko egoitzan bilduta adierazi du atzeraldia eman dela Euskadin bakea finkatzeko bidean zeuden aurreikuspenetan, ETAk bere azken komunikatua plazaratu ostean eta Auzitegi Nazionalak Herrira taldeko aktibista batzuk atxilotzea agindu ondoren. EAJren esanetan, iragan astean ETAren azken komunikatua ezagutzera eman zenez geroztik atzeraldi kezkagarria eman da Euskadin bake bidean zeuden aurreikuspenetan. Desagertzeko prozesuan aurrerako urratsak eman beharrean, ETAk bere bortxazko ibilbideaz harro agertu den bitartean, "Herrira" elkarteko militanteen atxiloketan erakutsi den bultzada politiko eta judizialak iraganeko denboretara eraman gaitu, zeinetan ilegalizazioa, blokeoa eta "dena da ETA" tesiak herri hau gatazkara kondenatzen zuen, bizikidetza blokeatuta zegoen zerumugara begira. Argazkian, EBBren bilera bat / © EAJ.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun