Herriraren arabera, "anitzak izan dira euskal preso eta iheslari politikoen alde buruturiko ekimenak eta Euskal Herriak jasan duen eraso berri hau borroka horretan jarraitzeko beste arrazoi bat besterik ez da. Argi utzi dute herri honek egunero erakusten duen elkartasunak urduri jartzen dituela eta beraien urduritasunak gora egingo du, mantentzen duten blokeoa apurtu arte", ohartarazi dutenez.
"Herrira herri izaera duen mugimendua izan da jaiotzetik eta heldu da ordua tantaz tanta itsasoa sortzeko. Heldu da herri gisa erantzuteko ordua. Horretarako, hainbat ekimen egingo ditugu", iragarri dute euskal presoen aldeko militanteek. Hasteko, asteazkenean eta ostegunean, "Oskar eta besteak libre egon arte", manifestazioa izango da azken egunotako ordu eta leku berean, 20:00etan, Kolas plazatik. Ostiralean, ordea, auzo eta herri guztietan ekimenak izango direla aurreratu dute. Azkenik, larunbat goizerako, 13:00etan "Itzubaltzetako herri osoa piztuko duen ekimenara gonbidatu" dituzte auzokideak. "Giza kate erraldoia" osatuko dute preso eta iheslari politiko guztien eskubideen alde, Aurrezki Kutxa, Gobelondo eta Kalamua kaleetatik. Arratsean Bilbon izango da nazio manifestazioa, 17:30ean Casillan abiatuko dena.
Oskar Sanchez Setien 24 urteko abokatu itzubaltzetarra astelehenean goizeko 10:30ak aldera atxilotu zuten Hernanin, Herrirak bertan duen bulegoan, bilera batean. Gauera arte han izan zuten, guardia zibilek lokala miatzen zuten bitartean. Egun horretako iluntzean, 620 lagunek eskatu zuten Sanchezen askatasuna Itzubaltzeta / Romon. Sopelan, Altzagan eta Astrabuduan ere mobilizazioak izan ziren, 70, 60 eta 25 pertsona batu zirela.
18 atxilotuei ETAko kideak izatea, erakunde armatua finantzatzea eta terrorismoaren goratzea leporatzen dizkie Velasco epaileak.
Gaurko manifestazioa argazkitan
Bart gaueko 9ak aldera hasi dira deklaratzen Guardia Zibilaren aurrean Herrirako 18 kide atxilotuak. Agerraldia Madrilgo Tres Cantos komisarian izan da eta inputatuek konfiantzazko abokatua izan dute alboan. "Busturialdeko Hitza"-k jakinarazi duenez, Nagore Garciari, Manuel Ugartemendiari, Gorka Gonzalezi, Ane Zelaiari, Francisco Baldari, Jon Garairi, Sergio Labaieni, Imanol Karrerari eta Eneko Villegasi galdeketa egitea zeukaten aurreikusita. "Biharko egunean [asteazkenean] zehar, Oskar deklaratuko duela jakin izan dugu" esan diete Itzubaltzetako Herriraren kideek Oskar Sanchezen alde iluntzean manifestatu diren 400 pertsonei. Aurretik zabaldu bezala, atxilotuak ostegunean pasako dira Eloy Velasco epailearen aurretik, "egun horretan amaitzuko baita legeak ezartzen duen 72 orduko gehienezko epea". Herrirak gatibu itzubaltzetarraren senideek eta gertuko lagunek emandako mezua ere zabaldu die plazan batutakoei: "gure eskerrik beroenak, zuei, guztioi, itzelak zarete eta ematen diguzuen elkartasun eta indar honekin muga guztiak apurtuko ditugu”. Horrekin batera, biharko eta datozen egunetarako mobilizazio gehiago iragarri dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun