Atzo (larunbatean) Bilbon erakutsitako indarra aitatzen duzu, eta Herrirak egindako lanaren zilegitasuna aitatzen. Ados. Ezin itsuarena egin argazki urdin erraldoiaren biharamunean... Indar hori aste osoan zehar joan da jariatzen, marea handi bihurtu arte: kultura, kirol, politika, sindikalgintza eta gizarteko arlo guztietako pertsonak eta taldeak tanta izan dira. Tartean, herri eta auzoetan, ez dira gutxi izan elkarretaratze eta abarretan parte hartu izan duten herritar jeltzaleak. EAJren zuzendaritzak, ostera, nahiago izan du albotik begiratu. Nahiz 2013ko urrian edonorentzat ulertezin eta salagarri izan askatasun demokratikoen kontrako eraso bortitz hau, EAJren zuzendaritzak nahiago izan du Ertzaintza Guardia Zibila eskoltatzera bialdu, herriaren gehiengoaren sumindurarekin bat egitea baino.
Urkullu lehendakariak, Ortuzar EBBko buruak eta orain zuk zeuk ekidistantziaren jolasean aritzea nahiago duzue antza, zintzotasun tanta barik. Ekidistantzia hori, ostera, faltsua da 2013ko urri honetan, Aietetik eta ETAren behin betiko amaieratik bi urte luzera. Ekidistantzia horrekin bide ematen diozue PPri egunero presoen eskubideak urratzen jarrai dezan, eta edozein egunetan Herrira-rekin gertatu moduan beste edonorekin, edozerekin ere, suntsiketa antidemokratikoa egin dezaten. Zintzotasun eta ausardia tanta bat, mesedez Itxaso. Utziozue behingoz estatu faxista honi babesa emateari.
Maribi Ugarteburu EH Bilduko legebiltzarkidea Itxaso Atutxa EAJren BBBko presidenteari erantzunez.
Bilboko marea urdinaren biharamunean, edalontzian gainez egiteko moduko tanta isuri duzu, Itxaso. "Bilboko kaleetan erakutsitako indar horrek ETAri presoentzako banakako neurriak baimendu ditzala eskatzeko balio beharko luke" dinozu. Eta, barriro ere, pausoak eman behar dituena EH Bildu dela esateko aukerarik ez duzu galdu. Nahita ahaztu duzu, antza, atzo (larunbatean) Bilbon batutako jendetzaren aldarria zein zen: "Tantaz tanta, euskal presoen eskubideen alde". Egunero-egunero, salbuespenezko gerra-politika aplikatuz urratzen diren eskubideak baitira 600dik gora preso politikoenak, eta bidenabar haien senideenak. Eta ondo baino hobeto dakizu, eskubide horiek errespetatzearen aginpidea ez dela ez presoena eurena, ez ETArena, are eta gutxiago EH Bildurena. Kartzeletako giltza, dispertsioarekin amaitzekoa, zigorrak beteta dituzten pertsonak, gaixoak eta adinduak etxeratzeko giltza, tamalez Espainiako gobernuaren eskuetan dago. Baina zure berbetan, Itxaso, oraingoan ere ez dago interpelaziorik PPren gobernuarentzat. Argazkian, jende uholdeak salatu zuen larunbatean Bilbon Herrira mugimenduaren kontrako polizia operazioa / © Tantaz Tanta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun