Horrekin batera, udal sare osoak erantzun koordinatu eta bakarra izan dezan lonjen egoeran, inplikatuta dauden atal nagusiekin adostutako protokolo bat egingo da. "Esku hartuko dugu, baita ere, alderdien artean gatazka sortzen duten egoeren aurrean", zehaztu dute Udaletik. Azkenik, bigarren fase horrekin, udal ekitaldietan nerabeen parte hartzea dinamizatzen saiatuko dira, eta Udalaren eta gazteen arteko komunikabideak bideratu. "Lonjetan dauden pertsonak dinamizatzea gazteek eurek eskatu dutelako da, dibertimendua sustatzen duten aisialdi aktibitateak eskatzen baitituzte. Hori bat dator lonjen erabilera egokia ikustarazteko interesarekin, eta sormena potentziatzearekin, topaketak, lehiaketak edota aktibitateak antolatuz", azaldu dute tokiko agintariek.
Lonjen eta erabiltzaileen profila Leioan
Gehienak herrigunean daude (%86,30). Kasu gehienetan, 18 eta 25 urte bitarteko eta sexu bietako 6 eta 10 pertsona bitartean egoten dira. 2 eta 4 urtez (%30) daramate lonja horiek erabiltzen. Normalean, astean zehar joaten dira 23:00ak arte (%51,72), eta asteburuetan, goizlaldeko ordu biak arte (%75,86). Kontratua dute (%74,4) eta asegurua (%60,34), eta batez beste, 350 euro ordaintzen dute. Ura, argia eta komuna daukate, baina ez daukate ez sukalderik ezta su-itzalgailurik ere. Aireztatzea eta airea berriztatzeko mekanismoak onak dira. Espazio zabal eta lasaiak dira, higiene egoera onean.
Gazteen lonjen "segurtasuna eta bizikidetza hobetzeko" proiektuaren lehen fasean 60 lonja erroldatu ditu guztira Leioako Udalak. "Lan honekin, lortu egin da hobetzea gazteen partaidetza Toki Administrazioan, eta era berean, orain, lonja hauen eta bere erabiltzaileen datu basea daukagu protokolo bat eta segurtasun plana jorratzeko. Horretarako ere lonjetan dauden herritarren partaidetzarekin kontatuko dugu", azaldu dute agintari leioaztarrek. Udaletik diotenez, erroldaz gain, gazteenen aisialdiari buruzko ezagutza sakonagoa izaten saiatu dira, lokal pribatu hauen erabileran zentratuz. Lan hori egiteko 1.579 inkesta egin dira udalerriko 11 hezkuntza zentrotan eta Leioako Aterpe Gaztegunean. Udaltzaingoak ere lagundu egin du existitzen diren gazteen lokalak identifikatzen. Lehen faseak 60 gazteen lonjen errolda osoa eman du emaitza modura, ezaugarri zehatz guztiekin, "gazteen beraien laguntzari esker, gehienek (%94,83) lagundu baitute prozesu horretan". Behin erabiltzaileak eta lonjak identifikatuta, proiektuaren bigarren fasea hasiko da, bizikidetzaren kudeaketa, eta egindako errolda ere gaurkotuko da. Beste gauza batzuen artean, gazteei informazioa emango zaie lonjekin zerikusia duten gaiei buruz, eta lokal horiek erabiltzeko aholkuen Gida egingo da, segurtasun eta bizikidetzaren inguruko gaiak jasoz. Gainera, gidaren jarraipena eta zabalpena ere egingo dira. Argazkian, gazteak lonja batean / © Leioako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun