Itzubaltzeta / Romoko Gobela kiroldegiko futbol zelaiak soropil artifizial berria dauka jada, Getxoko Udalak jakinarazi duenez. Romo eta Arenaseko futbol eskolek estreinatuko dute jokaleku berritua bihar, ostiralean, 18:30ean, Imanol Landa alkatea eta Álvaro González Kirol zinegotzia bertan direla. Ekipamendu horren berritze-lanen barruan, joko-zelaia sustengatzen duen lurzorua iragazgaizteko lanak ere egin dira, udal kirol instalazio horretako garajeetara ura iragaztea ekiditeko. Gobela kiroldegiak Itzubaltzeta / Romo eta Areetako auzoei ematen die zerbitzua. Soropil berria ipintzeko eta zelaiaren iragazgaizteko lanek 350.000 euroko kostua izan dute (150.000 euro belar artifizialak eta 200.000 euro iragazgaizteak) eta aurreikusitako epearen barruan amaitu dira. Argazkian, 2010eko abenduan bukatu zituzten Algortako Bolue 1 eta 2 futbol zelaiak berriztatzeko lanak / © Getxoko Udala.
Birmoldatze-lanak Getxo Kirolak udal erakundeak koordinatu ditu, Gobelan entrenatzen eta lehiatzen diren taldeei ahalik eta kalte txikiena eragiteko. Horrela, Gonzálezek zera azpimarratu nahi izan du: “herriko futbol klub ezberdinen artean egon den kolaborazioa, Areetako zein Romoko taldeek aurre-denboraldia egin eta ligako lehen partiduak Fadurako instalazioetan joka zitzaten”. Soropil berriak Bizkaiko Futbol Federazioaren homologazioa jaso du jada. Horrela, zelaiaren dimentsioengatik (102 metro luze eta 60 metro zabal) zein gainerako zerbitzuengatik maila goreneko partiduak jokatzeko prestatuta dagoen futbol zelaia dauka honez gero Gobelak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun